E valu ni moliaga ua faia e le Komisi o Galuega faasaga i le Ofisa Sili o le Matagaluega o Galuega, Afamasaga Su’a Pou Onesemo, i lona faia o ni uiga faaalatua i se kamupani. E lei mafai ona auiliili mai e le Minisita o Galuega, Susuga Papalii Niko Lee Hang nei moliaga, peitai, na ia faamaonia e 8 moliaga ua molia ai e le komisi o galuega Afamasaga ma ua tuuina atu nei le faaiuga o suesuega a le PSC agai i leoleo mo le suesueina.
“Ua iai moliaga ua faamaonia e molia ai e le PSC ia Afamasaga i le faatinoga o lana galuega e tusa ai ma tulafono o loo faatino ma faasino ai a latou tiute i le faatinoga o latou galuega.” O le mataupu lenei na tulai mai ia Iuni o le tausaga lenei, ina ua tusi mai se tasi o kamupani Initia i le taitaifono o le Komisi o Galuega ma faailoa mai iai faiga faaalatua o loo tuua’ia ai Afamasaga.
“O le taimi nei o loo faamalolo lē tumau pea Afamasaga, ma afai ae oo i le faamasinoga ma faamaonia, o lona uiga o le a fai loa iai se isi fuafuaga a le malo, ae afai ae lē faamaonia o lona uiga e tatau ona toe faigaluega.” “O loo malolo lē tumau Afamasaga e aunoa ma le totogi.”
O le kamupani Initia e ta’ua o le Ascent Navals na tusi i le komisi ma tuua’ia Afamasaga i ni pepa malaga atoa ai ma ni meatotino, ae tuuina atu galuega a le malo e faatino e le kamupani.
Peitai na saunoa Afamasaga ua lē fiafia le kamupani ia te ia ona ua ia teena nisi o galuega a le matagaluega na mananao iai.
