Ua faaalia e le Palemia o le Minisita o le Matagaluega o Leoleo, e lē taofia suesuega a Malu o le Malo ae a maua loa molimau ua faia loa moliaga

Ua faaalia e le Palemia o le Minisita o le Matagaluega o Leoleo, e lē taofia suesuega a Malu o le Malo ae a maua loa molimau ua faia loa moliaga

O suesuega a leoleo a maua loa molimau e lagolago ai se solitulafono ona faia loa lea o moliaga.

O le finagalo lea o le Palemia o le Minisita o le Matagaluega o leoleo e tali atu i atugaluga o le Peresetene o le Sosaiete o alii ma tamaitai Tausi Soifua faauuina o Samoa le faletua o Solialofi Papalii, sa ia fesiligia le faia o moliaga o tausi soifua e toalua o ni tamaitai ona o le fano o ola o pepe e toalua ina ua mae’a ona fai o la tui puipui mai faama’i o le misela, rupela ma le mami.

O loo faatali le faaiuga o suesuega o loo faia i fafo i le mafuaaga tonu na uma ai ola o pepe, peitai ua faailoa e le Faatonu sili Aoao o le Soifua Maloloina le tofa Leausa Dr Take Naseri, o loo iai nisi suesuega o loo toe faia e saga faamautu ai le mafuaaga ona faatoa faalauiloa lautele ai lea o le taunuuga o ia suesuega.

O le vaega tonu lea na mafua ai ona atugalu le Peresetene o le sosaiete a Tausi Soifua ona i lona talitonuga e tatau ona faatali muamua le faaiuga o ia suesuega.

O le Aso Lulu ua mavae na molia ai e leoleo le isi tamaitai tausi soifua ua 52 tausaga o lona soifua.

O le moliaga o le fasioti tagata pa’ivalea poo le manslaughter ua molia ai ona o le uma o le ola o le pepe lona lua.

O le moliaga foi lea ua molia ai le tamaitai tausi soifua na muamua molia ma taofia i le vaaiga a leoleo ae na tatala i tua i le Aso Faraile 10 o Aokuso ae o le Aso Tofi na tea nei 16 o Aokuso na tatala ai i tua mai le vaaiga a leoleo le tausi soifua lona lua.

“Na o i Savaii leoleo o loo faia le suesuega ma aumai le tausi soifua i le ofisa autu o leoleo i Apia ma fautuaina ai i ona aiātatau faaaletulafono ma faia ai loa ma moliaga”, o le tala lea mai se tasi o leoleo sinia na mafai ona fesili iai poo ua oo i fea a latou suesuega.

Ua faaalia e le Faatonu sili aoao o le soifua maloloina i se televise i Niu Sila ua oo atu ia te ia faamatalaga ua masalomia ai o se faaletonu ma se sese mai gaioiga faaletagata human error, e fesootai ma le mafuaaga o le tulai mai o le faalavelave ua uma ai ola o pepe e toalua na fai tuipuipui i le falemai faaitumalo i Safotu Savaii i le amataga o le masina o Iulai 2018.

O le aso 27 o le a valaau ai moliaga o tausi soifua ua molia i luma o le faamasinoga maualuga. O loo taofia pea e leoleo le faailoaina o suafa se’i oo i le taimi e tutulai ai i luma o le faamasinoga.