Muamua ona e faato‘ā Tali lea i soo se Suesuega
E tiga poo le ā le toe taumafai mulimuli o le loia, e le mafai ona toe aveese au faamatalaga ua fai se‘i vaganā ua uia auala i fale faamasino e taugata, ma leai se faamaoniga a ave e malo. E pei ona tou silafia, o faaiuga e fai e faamasino, e le faia e le loia. O le loia e finau mo oe i le tulafono ae o le faamasino e faia le faaiuga.
Fautuaga:
Poo se tuua‘ia o oe e leoleo, poo totonu o le fale faigaluega, poo totonu o se mataupu tau lotu, poo mataupu e tau i se fale o le malo o e nofo ai ua tuua‘ia ai oe i ni pepa faatumu faapea ua e faatumuina pepelo, poo le ā lava le mataupu, ou te fautuaina lava lou saili o se fesoasoani a se loia i le amataga a o e lei tautala pe fai sau tali i se tuua‘iga poo se mea ua tupu.
Ioe, e totogi se pili e ave atu ai se fautuaga i le taimi muamua, ae laitiiti mamao lava le tupe e alu i le taimi lea, e ave atu ai le fautuaga i lo le te‘i ua tuli ma le galuega, falepuipui i se mea na lē tatau ona e falepuipui ai, ma faapea ona molia oe i se mea e le tatau ona molia ai oe, talu lau tali na fai i se taimi muamua.
O le tele o tatou tagata e fai tali ma le lē malamalama atili i le uiga tonu o le fesili. O “upu” i luga o le tulafono, e iai uiga faaletulafono e iloa e loia faavasega, ona fautua atu lea i le tali e fai.
Fesoasoani faaloia i le amataga e tāua:
E lē o le tiute o le loia e fai atu ia te oe lea ua tuua‘ia, e fai se tala pepelo – e lē o le galuega lea a le loia.
O le galuega a le loia o le vaai i se pepa
poo ni pepa na ave atu ia te oe, faitau, faitau le tulafono e faapatino i mataupu lea ua
fesiligia ai oe, vaai ni faaiuga o ni faamasinoga i ni mataupu e pei o le mataupu lea ua tuua‘ia ai oe, talanoa atu ia te oe poo le ā tonu le mea na tupu, ona fautua atu lea ia te oe, se fautuaga faaletulafono, ma ni upu e te tautala ai, a o e lei tautala
Afai e lē lelei lau gagana faaperetania, e tāua lou saili o se fesoasoani i le amataga a o e lei
tali i se tuua‘iga:
E tele uiga o upu faaletulafono e le malamalama ai tagata lautele. O le tulafono e tusia i le gagana peretania. O moliaga ma suesuega e fai uma i le gagana Peretania. E tusa pe lelei lau English, e telē lava le eseesega o uiga o upu faaperetania ma uiga o upu faaletulafono.
E tāua le tapa o ni pepa o tusia ai le mataupu lea e fesiligia ai oe, a o e lei tautala:
E puipuia oe i luga o le tulafono, e leai se isi e mafai ona faamalosia oe e te tali i ni moliaga, a o e lei iloa lelei le mafuaaga o moliaga. Afai e te muai tali, a o lei vaai i ni pepa tusitusia, o lona uiga ua e tago lava oe faataga le aveeseina o lau aiā e puipui ai oe (“you have waive your right to remain silent”).
Faaeteete pe a fai mai e avatu lau
support person:
O le tele o tatou tagata e vaai loa i le upu o le support person, faapea e soo se isi lava e ave la te toalua. O le taimi lava e te tapa ai se “support” poo se fesoasoani a se isi e malamalama i le mea o le a tupu ia oe pe a e faatamala. E tatau lava i le amataga ona e saili i se fesoasoani, ma se fautuaga atu ia te oe i le tulafono, a o e lei tautala lava oe i soo se isi lava, i se mataupu ua tuua‘ia ai oe.
A faaaogā le auala lea atonu e tele o tatou tagata e lē lavevea, ma molia i mea e lē tatau ona molia ai. E tāua tele foi lenei fautuaga i tagata faigaluega ona ua faigata ona maua galuega. Ou te iloa foi a faaauau le mataupu i se fale faamasino i se taimi mulimuli, ae na lelei ona fai mai i le amataga, e lē telē se taimi ma ni tupe e alu e
finau ai.
E le gata i le faigata o mataupu talu ai le tou lē nofouta i mea ia e ta‘ua i luga, ae a tou susulu mai i loia a ua telē le faaletonu ma le lavelave o le mataupu, o le tele foi lena o galuega fai, ma tupe e totogi mo galuega a le loia. A nofouta i fautuaga ia e ta‘ua i luga, e manuia outou, ma laitiiti le tigaina o le loia, i galuega fai, ma laitiiti le pili e totogi ma taimi e alu mo
galuega faaloia.
