O le Aso Tofi ua tea i le vaiaso ua tuanai, na faailoa faalauaitele mai e le Malo faapea o le a matuā saili ma suesueina latou uma ua maua le penefiti o le ‘solo mum’ poo le ‘solo parent’ i se auala taufaasese poo le faagaoi, ma molia loa latou i le tulafono.
Na faailoa mai e le Minisita lagolago o mataupu tau penefiti, le alii o Chester Burrows, faapea o le a matuā molia uma latou, ma faasala i le tulafono. E le gata i lea ae o le a molia foi ma faasala tai toalua poo paga a latou ua faasala i se faiga taufaasese poo le faagaoi na maua ai le penefiti o le ‘solo mum’.
Afai e molia ma faamaonia lou solitulafono i le faiga taufaasese poo le faagaoi ina ia maua se penefiti, o le a faasala tupe oe ia le silia ma le $5000, poo le falepuipui foi o oe mo le tasi tausaga.
O lona uiga afai na e maua le penefiti o le ‘solo mother’ poo le ‘solo parent’ i se auala taufaasese, e le gata o le molia ma faasala o oe, ae e molia foi ma faasala ma lau paga poo lou toalua.
E le mafai ona e ‘alo faapea o lou toalua na faia le solitulafono – o le a lavevea faatasi pea oulua ma molia i le solitulafono. O le mau lava a le Malo, e ao ona molia ma faasala uma latou o loo solitulafono ma ave faagaoi tupe a le Malo.
E ui ou te le teena le faaupuga faapea ‘e tatau lava ona faasala latou uma o loo solitulafono’, peitai ane o loo finau atu pea le Itu Agai i le Malo, aua le soona faasagatau i tagata o loo maua le penefiti, ae faapelepele i le toatele o isi tagata o loo fai le solitulafono o le ‘tax evasion’ poo le taumafai lea e nanā poo le aloese mai le totogiina o lafoga e tatau ona totogiina.
O le tagata ua taumafai e maua i se auala taufaasese le penefiti o le ‘solo mum’ (benefit fraud) – o le tagata lea ua taumafai e ave faagaoi se tupe mai le Malo e ui e le agavaa mo lea faamanuiaga.
O le tagata ua lē o totogiina lana lafoga e tatau ona totogi (tax evasion) – o le tagata lea ua solitulafono ona ua musu e tausi le tulafono i le totogiina o ana lafoga i le Malo e pei ona aiaia manino i tulafono.
I faamaumauga mai lipoti o le tausaga ua tea o loo ta‘ua faapea o le aofai o tupe ua lē maua e le Malo talu ai le aloese mai le totogiina o lafoga i le Malo e tatau ona totogi, ua i le va o le tasi piliona tala agai atu i le $6 piliona tala. A o le aofai o tupe ua ave i se auala taufaasese mai e latou o loo maua le penefiti e latalata i le $39 miliona.
O lona uiga e aupito i sili atu lava le tele o le tupe a le Malo o lea o loo taofi sese e latou o loo mumusu e totogi latou lafoga (tax evasion), i lo le tupe faamaimau talu ai nisi o loo taumafai e maua le penefiti i ni faiga taufaasese.
E tatau lava i le Malo ona saili ia molia ma faasala uma tagata o loo faia soo se solitulafono, aemaise i latou o loo taofi le totogiina o latou lafoga e tatau ona latou totogiina (tax evasion). E lē o se amio lelei le tulituliloa na o latou o loo masalomia i le ‘benefit fraud’, ae e tatau ona suesue foi latou o loo faia lea solitulafono o le ‘tax evasion’.
O loo mautinoa lava ia te au, o ia faiga ua alalaga ai foi le faigamalo ma faasagasagatau ia i latou o loo maua le penefiti, o le taumafaiga lava o le Malo ina ia faaleaga ia i latou uma o loo maua le penefiti.
Silasila foi, talu mai lava le tulai mai o lenei faigamalo ua tele suiga o tulafono ua faafaigata ai lava ona maua le penefiti mo latou o loo manaomia le fesoasoani mai le Malo.
E toatele tagata sa masani ona maua le fesoasoani o le penefiti ua taofi ua lē toe maua lea fesoasoani.Sa taumafai lava le faigamalo ina ia faaleaga tagata o loo ola i le penefiti, ina ia faigofie ai ona taofi ia polokalame a le Malo.
E ui lava ou te talitonu e lē o se mea lelei le ola o soo se tagata i se penefiti mo se taimi umi, peitai ane ou te matuā talitonu e tatau pea ona iai se polokalame tau penefiti ina ia mafai ai ona fesoasoani mo i latou o loo manaomia le fesoasoani ona o mafuaaga lē maalofia.
E le gata i le penefiti ua faigata ona maua e i latou o loo manaomia le fesoaosani tau tamaoaiga, ae ua faigata foi le maua o fale mo aiga o loo manaomia lava le fesoasoani.
E ao lava ona mataitu e le tatou Atunuu nei suiga. E mafua nei suiga ona o faiga faavae a le faigamalo o loo iai nei.
E pei e faigofie le taumafai e unai ese tagata mai le penefiti ma fale a le Malo pe ana faapea lea e iai galuega e mafai ona agai i ai. Ia e le gata o le maua o galuega ae ia lelei totogi o ia galuega mo le tausiga o aiga.
Afai foi ua lē maua se galuega ae ia faafaigofie ona maua polokalame aogā e aooga ai. E le gata ia lelei polokalame aoga ae ia maua ai se faailoga tāua ma e tatau ona amanaia ma taulia le faailoga i galuega.
E ao lava ona manino mai i nei faiga a John Key ma lana faigamalo e lē o toe mafai lava ona faamoemoe se isi i le faigamalo o loo iai nei.
Mo le tatou lava atunuu e ao pea ona tatou silasila mamao ma saili le tofa mamao i auala e manuia ai o tatou aiga mo le agai i luma.