Ua faamautuina nei le suiga tele ua oo i ai aafiaga o le tamaoaiga mafatia o le lalolagi (recession) e faatusa atu i le sefulu poo le luasefulu tausaga talu ai. Ma i totonu lava o Ausetalia o loo vaaia pea le tapunia o le tele o galuega ae auina atu ma faatū i Saina, Initia poo Filipaina ma Meleisia.
E le gata i kamupani vaalele ae ua vaaia foi soo se pisinisi o loo fia faaitiitia ana tupe faaalu. O le tele o Fale gaosioloa ua vāea ma faamalolo i lenei vaitau.
Na faaalia e se tamā Samoa ua atoa le luasefululima tausaga o galue i Ausetalia nei ma e lē o fia faailoa lona suafa, “O aso ia e tusa ma le 20 tausaga talu ai, na matuā tele ma faigofie ona maua galuega i Sini nei auā e uma lava lau galuega i le taeao ma e savalivali atu maua lau galuega faaopoopo i le aoauli ma le sifi po.”
O lenei vaitau ua matuā suia uma galuega ma ua auina atu i agents ma Ofisa tumaoti.
“Ua tele foi le tauvaga mo nai galuega o loo maua atili ai ma le siitia i Asia o galuega. Ua leva tausaga o manuia lo latou aiga i lau galuega i le Telstra ae peitai ua vāea matou ma o loo tau saili lava se galuega e fesoasoani i le mokesi lea toe sefulu tausaga o totoe.”
O le atalii o lea tamā ua ono tausaga o galue i le kamupani vaalele iloga Virgin, ae peitai o le tausaga talu ai na malolo mai ai i le Viirgin Airlines ia i latou na vāea. O loo fagaluega nei i se faleaiga e faatalitali ai nisi avanoa i isi kamupani. O le fautuaga a lenei tamā mo tagata Samoa o loo fia siitia mai Samoa, “E malo lava si o tatou atunuu a leai se galuega e le popole i le rent poo
se mokesi”.
O nai tagata Samoa e malaga mai e aunoa ma se sitiseni Niu Sila i Ausetalia, e lē maua ni a latou penefiti mo le fanau ma e lua tausaga e faatali ai faatoa mafai ona talosaga mo le nofomau (permanent residency) faatoa mafai lava ona fai le sitiseni i le mae‘a ona totogi le $2,999 Ausetalia lea e tusa ma le $6,500 tala.
O le isi vaega taugata tele o le totogi o le Fomai auā e lē maua le Medicare vaganā le tuanai o le lua tausaga. E feololo pe a taufai galulue uma, faaopoopo i ai ma faalavelave i Ausetalia nei, Samoa ma tupe faaalu o le vaiaso. Afai foi e nonofo i se tasi o o latou lava aiga, o le a iloga le faigata auā o le lua tausaga o se taimi umi tele.
O nisi mai Niu Sila ua siitia mai ua faatau o latou Fale ma e lelei i latou e maua vave ni galuega a o nisi e tuai e ono faamoemoe ia latou lava seleni mo le taimi o faalavelave ma le tele o sailiga seleni i totonu o Sini e pei o Battons Up, Lūlū ma Tusigaigoa.
Mo le mamalu o le atunuu e asiasi mai i aiga i Ausetalia, e tatau lava ona totogi le inisiua asiasi (visitors insurance cover) e amata atu i le $100 agai i luga e fua i le umi o le tafaoga mai i Ausetalia ma le matua o le tagata asiasi mai.
Afai e gasegase se tasi ma taofia i le falemai i Ausetalia nei e aunoa ma se
inisiua, e amata atu i le $20,000 i le 50,000 poo luga atu foi le tau o le falemai e fua i le umi o gasegase o se tasi e asiasi mai.
