Ua silia ma le vaiaso talu ona taunuu i Aukilani tama fusu faapolofesa e toafā mai Samoa e tapena ai mo paga faaopoopo o le fusuaga tele a David Tua o lumanai nei ma le alii Amerika o Demitrice King, ma ua atoa ai le vaiaso o koleni faatasi ma Tua ma Maselino Masoe.
Saunoa Jenkins o le pulega a le Event Polynesia i Niu Sila, “O se avanoa lē aumaua ua tuuina mai e le susuga ia David Tua e koleni ai alo nei mai Samoa i lona falekoleni.
E faafetaia foi le galuega a Lotoialii Alex Su‘a ma Maselino Masoe o loo fesoasoani i koleniga.
O le mea moni e tele le suiga o le a maimoa i ai le atunuu i alo nei mai Samoa i le siitia o le latou taalo i le fusuaga o lumanai nei.”
Faamaonia mai e le Tuigamala Vaaiga (Inga) Tuigamala o loo faafoeina le fusuaga a David Tua i le Aso Toonai, 19 Mati le maua ai nei o le avanoa e fusu ai Oli Filimaua i lea foi po ma le alii Maori o Steve Heremaia o le siamupini o Niu Sila.
O le alii o Oli o loo fusu foi i lalo o le pulega a le Event Polynesia e mai afioaga o Faala Palauli ma Fagalii ma o loo avea ma siamupini o le Welterweight a Samoa. Ua atoa ai nei le toalima o alo mai Samoa ua maua avanoa e fusu ai i le fusuaga tele a David Tua.
Faaalia e Tuilagi Saipele Esera o le pulega a le Event Polynesia i Samoa, “O le fusuaga tele ia Mati e atoa i ai le fā tausaga talu ona toe lalaga fusuaga faapolofesa i Samoa.
O le maua o avanoa o tama fusu e toalima i paga faaopoopo e valu o le fusuaga a David Tua o le isi lea pine i le tulaga lelei ua iai le atinaeina o fusuaga faapolofesa i Samoa.”
“E leai se eseesega o le tulaga ua iai le lakapi taitoafitu a Samoa ma le tulaga o loo agai i ai fusuaga faapolofesa.
E lē o toe taumatea le mafai e alo mai Samoa ona oo i le siamupini o le lalolagi pe a mautu se tapenaga; pei foi o Maselino Masoe i tulaga o fusuaga.
Pau le eseesega ona o le taitoafitu a le Manu Samoa o loo lelei le faatupeina mai le IRB ma le Malo o Samoa, ae o le atinaeina o fusuaga faapolofesa o loo tele ina tagi i lima.”
O Vaitele Soi e mai afioaga o Vailele, Vaovai i Falealili ma Taga, o loo avea ma siamupini o Samoa i le aupaga o le Cruiserweight, o le a fetaui ma le alii Tonga o Oscar Siale.
O Warren Fuiava o Fa‘ala Palauli ma Lalomalava o loo avea ma siamupini o Samoa i le aupaga o le Light Heavyweight sa tuu e fusu ma Daniel MacKinnon o Niu Sila, o le a fetaui nei ma Niusila Seiuli sa avea ma avefu‘a a Samoa i le tele o tausaga i taaloga amateur ma avea foi ma siamupini i taaloga faapolofesa i Samoa a o lei nofo ai nei i Niu Sila.
O Pele Faumui o le siamupini o Samoa i le aupaga Middleweight mai Vaiafai i Iva ma Lalomalava o le a fusu i le paga i luga o le Super Middleweight ma le alii o Gunnar Jackson o Niu Sila.
O Leti Leti e mai afioaga o Faleapuna, Lalomauga, Salimu i Fagaloa ma Lano i Savaii, o le a fusu ma Ray Musson o Niu Sila i le aupaga Welterweight, ma o se tasi lea o paga mataina o le a iai i lea afiafi.
O loo faafetaia e le pulega a le Event Polynesia nisi o kamupani a Samoa o loo faipaaga mo le atinaeina o fusuaga faapolofesa i Samoa e aofia ai le faletelefoni a le SamoaTel, faletaavale Motor 1 Samoa, falekoleni JP Fitness, faletalimalo Hennies Motel, faletupe o le Samoa Commercial Bank, fale o mea faufale o le ACE Hardware & Samoa Builder’s Supplies aemaise o le lagolago a le Malo o loo auala mai le TAB.
Faailoa mai e Jenkins Tesese o le ofisa o le Event Polynesia i Niu Sila, “O le taimi nei o loo sailia ni sponsors auā le tausiga ma tapenaga a alo mai Samoa a o iai i Niu Sila.
E fai lava si taugata o le tapenaga ona e lē o ni tagatānuu o Niu Sila pe nofo mau.”
“O le taimi nei ua oo mai le fesoasoani a nisi o kamupani i Niu Sila e pei o le ofisa soifua maloloina o le Health Star Pacific, fale o togiga lakapi Carisbrook New Zealand, kamupani e felauai ai uta i vaa, Agility Logistics ma le Vili’s Boxing Gym mo koleniga.”
Mo nisi e fia fesoasoani i le tapenaga a alo mai Samoa e mafai ona faafesootai Jenkins Tesese i le numera Niu Sila (021) 127-4286, poo Tuilagi Saipele Esera i le numera Samoa 751-9458 poo le imeli: info@eventpolynesia.com
