Malo le soifua maua ma le lagi e mamā, susuga i faafegaiga ma o outou faletua, faapea le mamalu i tupu ma tamalii, tulatoa o Samoa faapea faletua ma tausi. Tainane le maave eseese o si o tatou atunuu e afua mai mauga tetele e oo lava i mauga iti.
O le a taumafai i lenei tusitusiga e faaaogā se gagana faigofie poo le gagana foi o aso uma ina ia mafai ona malamalama.
Sa ou tupu a‘e i totonu o le afioaga o Vailima ma Vaoala i Upolu. E pei ona silafia, a e agai mai i Apia e muamua ona e tau atu i aega ma mauga faato‘ā tau lea isi o matou nuu.
O le aeae atu i Tanugamanono, faasolo atu i le aega o Papauta, faasolo atu ai i se tasi o aega sa masani ona faaigoaina o le aega o Lokeni ona o le faifeau EFKS o Vailima i ia ona po e suafa ia Lokeni.
O le maota o le galuega ma le malumalu e tu tonu lava i le aega. Ona faasolo atu ai lea i le aega i Avele, ma faasolo atu ai i Letava ma Vaoala.
E ui lava i le tele o aega ae pei o le aega sili ona tele ma faafefefefe i ai o ē sopo ma avetaavale, o le aega i Tiavi.
O i foi o loo iai le afu mataina e masani ona fai ma mata‘aga a turisi ma tagata faimagala e sopoia lea magaala.
A mavae lenei aega tele ona faaseesee atu loa lea i lalo ma taunuu atu i le afioaga o Siumu.
Ua mafua ona ou ta‘ua nei aega ona o i o loo iai se ata tāua tele. Soo se tagata e manatu e fia avea o ia ma ta‘ita‘i o se ekalesia poo se faalapotopotoga, ia tatau ona ia matuā mautinoa e lē faigofie, e tele faafitauli e luitauina ai ma e lē tatau ona faatagafai pe tago faatemeteme i ai.
O le tumutumu o le mauga o se nofoaga matagofie.
E iai le filemu ma le ea lelei aemaise e mafai ona e iloa lelei atu ai le mamao o ona siosiomaga auā o le a leai se mea e faalavelave i lau vaai. Peitai ane o le ala i le tumutumu o le mauga e lē faigofie.
O le toatele la o tagata e manao e maua loa le tofi taunuu loa i le tumutumu o le mauga.
E musu e iai ni faigata ma ni fita. O le tofi ta‘ita‘i e lē o se taunuuuga ae o le amataga lea o se savaliga umi ma se savali e luitauina e le tele o tagata.
O le galuega faataitai e tele ni aega poo mauga e tatau ona e uia, pe afai e fia taunuu i le tumutumu, poo le nofoaga o loo faananau le ta‘ita‘i ina ia taunuu i ai.
Poo le ā le manaia o le aave mai o tala o le nuu folafolaina o Kanana, peitai e tatau lava ona uia le vao mo ni tausaga se tele, e tatau lava ona faia se galuega e faatoilalo ai pa o Ieriko ma isi faafitauli i le ala, ina ia taunuu le faamoemoega ma manuia tagata o le Atua.
Filifilia o Taitai ma Tofi
O se tasi nei o fesili e fesili e le toatele. E faapefea ona filifili ta‘ita‘i i totonu o le ekalesia? E tatau ona faia se palota pe tofi mai e le faifeau? Ua toatele ni ekalesia e misa ma faaisaisa ona o le lē fiafia i le faaiuga o le palota, ma ua avea lea ma auala ua lē maua ai se lagona lelei i tagata lotu ma avea foi ma ala ua faamavae ai nisi mai le ekalesia.
Ae tatou te lei talanoaina pe faapefea ona filifilia ta‘ita‘i i totonu o le ekalesia, e ao ona tatou muamua malamalama i le a‘oa‘oga a le Tusi Paia e faatatau i le ekalesia. O le ekalesia e lē pei o isi faalapotopotoga. Soo se faalapotopotoga e tatau ona filifili ona ta‘ita‘i e faatatau i le ituaiga o faalapotopotoga.
Faataitaiga, afai o se faalapotopotoga taalo lakapi, e tatau foi ona filifili ona ta‘ita‘i ina ia mafai ona faataunuuina le faamoemoe o le faalapotopotoga. E tatau ona iai se coach poo se faiaoga e a‘oa‘oina tama taaalo ina ia malamalama i tulafono o le taaloga atoa ai ma metotia. Ina ia manumalo le ‘au i le taimi o taaloga, e tatau ona iai se faiaoga e koleniina le au lakapi ina ia fit ma malolosi le ‘au. O ia ituaiga o ta‘ita‘i ua filifilia e faatatau i le ituaiga o faalapotopotoga.
Afai ae filifilia ma tuuina nei ituaiga o ta‘ita‘i i totonu o le ekalesia e talitonu o le a iai se faaletonu ma lē faataunuuina le faamoemoe faaleekalesia.
Fai mai le tala a le Tusi Paia, o le ekalesia o le tino o Keriso. Ua tatou malamalama foi soo se tino e tatau ona iai sona auivi. O le auivi o lana galuega o le taofia faatasi lea o aano, o uaua, o maso ma musele uma o le tino ina ia mafai ona malosi le tino o le tagata.
O le tino o Keriso poo le ekalesia e tatau ona tatou malamalama i ai pe faapefea ona faataatiaina.
O le auivi o le tagata e lē mafai ona tatou vaai atu i ai peitai tatou te iloa ona o loo mafai ona faia lana galuega ina ia malosi le tino.
A oo la ina vaivai le auivi o le tino o Keriso poo le Ekalesia, e iai foi le talitonuga o le a faapea foi ona vaivai le ekalesia. O lea e tatau ai ona manino ma malosi le auivi poo le faataatiaga o le Ekalesia.
Afai ae masii atu ta‘ita‘i o le au lakapi e taitaiina le ekalesia, auivi poo le taitaiga o le ekalesia e taitaina ai le au lakapi, e mautinoa lava le faaletonu o le a oo i ai. Silasila foi oe, o le filifilia o ta‘ita‘i o se ekalesia e pei o le filifilia o ta‘ita‘i o le kalapu taalo. Ona o le itu faaleagaga o le ekalesia e tāua tele.
Se‘i manatu ane i faaupuga nei, ma aoaoga o loo tatou faaaogāina ae lē o aoaoina e le Tusi Paia. O le ā sou finagalo i ai auā e ese lona tāua i le taimi e folafola ai le ekalesia.
Muamua: Faigapalota
O faigapalota, o le komiti faafoe, o le palemene, polokiki. E lē o a‘oa‘o mai le Tusi Paia i nei tulaga e ui ina o loo faaaogāina i totonu o le tele ekalesia.
O le tele o Ekalesia o loo latou faaaogāina faigapalota e filifili ai pe tofi ai ta‘ita‘i i totonu o ekalesia. Ae manatua, o faigapalota o le auala lea o loo faaaogāina e filifili ai i latou ua tofia faapolokiki.
O se fesili tele lea e tulai mai pe tatau ona filifili ta‘ita‘i o le ekalesia a le Atua i le auala o loo filifili ai faipule ma le kapeneta i faiga faapolokiki.
O tatou tilotilo i faiga palota tatou te iloa le faaletonu ma le femisaai o tagata. E lē gata i lea tatou te iloa foi le tau faifai ma le tau faaleaga o tagata i totonu o le Palemene.
O nisi ua iai le malamalama i auala e faaleagaina ai le isi sui tauva.
O le ā le a‘oa‘oga a le Tusi Paia e uiga i le auivi o le ekalesia, ma le eseesega o le ekalesia mai isi faalapotopotoga?
O le ekalesia muamua, fai mai le Tusi Paia, O le Mafutaga, lua o le Aiga, tolu o le Tino, ma le vaega mulimuli, o le ekalesia o le lafu mamoe.
O le a se‘i o tatou auiliiliina pea le finagalo o le Atua i le auala e taitaiina ai le Ekalesia ma filifili ai ona ta‘ita‘i. O le a sei o tatou matamata i le tala a le Tusi Paia i le vaiaso a sau.
Soifua ma ia manuia.
