O le malilie faatasi ai o se tamaitai ma se alii ua tutusa o la loto ia la filifiliga, e lē gata o le va ma aiga, le itu i aganuu a isi atunuu, ekalesia, ae sili ai le loto ua tasi ma fusia i le alofa moni, e lē pine ona faamalieina atoatoa lea ulugalii i se olaga fiafia.
E tele ni itu sa faafaigata ona faia ai le filifiliga a le tamaitai o Stella pe a fuafua atu i le pele foi ia te ia o tu ma aga a si ona ia atunuu, peitai na manumalo lona alofa ua pulunaunau i le lalelei ma le tausaafia o uiga o tamaiti suluie, ma faataunuu ai loa le sauniga paia o le faaipoipoga i le Aso Sa, aso 13 o Fepuari.
O Stella o se tamaitai talitonu gofie e ala lea i le liua mai ma papatisoina i le Ekalesia a Alele, le Aso Fitu Koneferenisi.
E lē gata i lea, ae ua ia talitonuina le tausaafia o aiga o si ana manamea. Sa taitaia le sauniga paia e le susuga i le faafeagaiga ia Pr Ieti Ah Shu o le Ekalesia Aso Fitu Koneferenisi i Logan City.
O mātua o le alii faaipoipo ia Alele, o le afioga ia Loau Avoka Vili (Saoluafata) ma si ona tina ia Lesa Vili Tagaloa mai Saipipi i Savaii.
O i laua sa fai ma fofoga o le aso o le susuga ia Sosaiete I‘a Lautasi, ma le tamaitai ia Nora, sa fesoasoani mo nisi e lē malamalama i le gagana Samoa. E toafā aumeamamae ma a la uosili.
O le susuga ia Leala‘iauloto mai le auvalaaulia sa tulai e faafetaia le atunuu faapea le mamalu i aiga na lua. Sa matagofie se taumafataga faapea faaaloaloga sa pa‘au ma faafaō i ai le aiga alii.
Alofaaga ma faamanuiaga mo le ulugalii fou mai ia Pr Ragoso ma le faletua ia Dorothy ma le nofoaalo i Tutuila, Ta‘e ma le nofoaalo, Fou & Fatima ma le fanau i Tutuila ma le tina matua ia Laupa‘u Mo‘aga, Toeaina ia Ilimatogafau & Araisa Limu ma le fanau, Alofa & Tauloa Faauma ma le fanau, Ane & Aana ma le fanau, Iese & Sa‘eni ma le fanau, taitai toeaina ia Lavea Tamala Peni ma Mati Vaili, taitai fesoasoani ia Faletui & Gia ma le fanau faapea le mamalu o le ekalesia Aso Fitu Toe afio mai i Logan City.
Manuia tele lo oulua aso fiafia Alele ma Stella.
