Talu ai e iai le instrument poo le pepa faamaonia e tatau ona saini ai Theresa McCarthy mo le faaliliuina o lona fanua i le NPF, lea na afua ai lava ona manao lava le tamaitai faipisinisi e lē tuua lava lana finau, ona e na te iloa ma mautinoa o loo sa’o lona mafaufau.
Peitai ina ua tulai le tamaitai Ofisa Pule lua o le Matagaluega o Puna’oa Faalenatura ma le Siosiomaga, Filisita Heather, na ia ta’utino ai i luma o le Faamasino, Justice Clark, “o loo misi lava le instrument” poo le pepa lena e iloa ai le faamaoniga faapea na saini e Theresa McCarthy lona fanua i le NPF.
E fā aso o faagasolo le mataupu lenei i le faamasinoga maualuga i Mulinuu. Na auauai atu ai molimau e lē gata o le itu a le NPF, lea na tulai ai le alii loia Mr Leung Wai, ae o molimau a le itu tagi, Theresa McCarthy lea na tulai ai le tamaitai loia Leulua’ialii Olinda Woodroffe.
Ina ua valaau le asiasiga i le fanua ma le auala lea na finauina i le faamasinoga, e oo atu i ai alii ma tamaitai ofisa o le faamasinoga, ua tautau le loka i le fanua. Peitai na maua ane le tagata e iai le ki ma mafai ai loa ona uia e alii ofisa ma loia. E lē o faatagaina e Justice Clark ona tapu’e ni ata o le asiasiga, talu ai o loo faaauau pea le mataupu i le faamasinoga.
Peitai na iloa ai, o le auala lea o loo finau ai le NPF, e oso tonu lava i le mea o iai le faletalimalo, e ui ina o loo iai lava le isi foi auala epei ona faaaogāina i le taimi nei. Na ta’ua e le molimau a le MNRE, o le auala na ala ona iai i luga o le faafanua, ina ia mafai ai ona uia isi fanua o loo i tua atu o le fanua o Theresa. Peitai o loo finau Theresa, e leai sana faatanaga e ave ai lona fanua e fai ai se auala e pei ona ta’ua i luga o le faafanua, talu ai o loo iai lava le auala i le taimi nei.
O le mataupu lenei, ua faitau tausaga talu ona fālō, talu le aitalafu e tasi le miliona tala a Theresa na faia i le NPF e atina’e ai lana pisinisi. Peitai e lei totogia, ma liliu ane ai le NPF, ave fasi fanua na faamau ai le aitalafu. O fasi fanua ia o loo finau ai Theresa e tusa le tau ma le 3 miliona tala, ae na’o le tasi miliona lana aitalafu. Ua aafia ai ma le fasi fanua na tu ai luga lona faletalimalo, e 20 potu moe lea ua leaga ma ua lē toe aogā.
O le tagi a Theresa McCarthy faasaga i le NPF, e 11 miliona tala, ma o loo faagasolo pea lea mataupu i le faamasinoga mo le aso 11 o le masina lenei, Fepuari, e faia ai Folasaga a Loia.
I le taimi na savali ai e Theresa ma lona toalua ma lana fanau le fanua, na maitauina le maligi o loimata, talu ai ua toe lalaga ane lagona o le tiga alofa i le tele o mea ua ma’umau, e lē gata o le faletalimalo, ua tuu na’o walls ae o le fanua ua togavao, o maa faamanatu sa fau e lo latou tamā, e manatua ai pea lea nofoaga.
Na maitauina foi e le tusitala se tamā na alu ane i lana nofoa tulei i lea aso, e atagia e iai foi lana aiā i le fanua lava lea e finauina e Theresa ma le NPF. Peitai sa leai lava sona faalavelave i le galuega a le faamasinoga, vagana ai lona taumafai e ta’u i se vaega o tusitala, e iai foi lona sootaga i le fanua lava lea. O loo maitauina foi e iai isi fanua i le vaiaai lava lea o Fugalei, o loo iai tala ave i finauga faaletulafono.
Peitai o le fanua tonu o loo finau ai Theresa McCarthy ma le NPF, o loo faamau i faamaumauga a le MNRE, i lalo o le suafa o Theresa McCarthy.
