Le afioaga o Falelatai i le mae’a ai o le apili i le tausaga ua mavae

O le vaiaso ua mavae na maua ai le tala i le mae’a ai o le fono faalemasina a le afioaga o Falelatai ua toe faate’a foi Anae Pita ma le afioaga, atoa ai ma lē sa avea ma faaaloaloga o le aiga sa Anae le afioga ia Anae Mati, ma ua o ese foi i tua ma le nuu le aiga Sa Anae, atoa ai ma nisi o le aiga Sa Misa. Sa fesiligia e le Samoa Times le sui sooupu o lea afioaga le afioga ia Nanai Faamanu Ivara i le mea na tupu.
Sa ia faailoa, o le mae’a ai o le toe faaa’e atu o Anae Pita ma isi na faatete’a, ina ua mae’a le apili a le afioaga i le Faamasinoga o Fanua ma Suafa, lea sa foi ai i fanua ma le fiafia ina ua tuuina mai le iuga. “E toe foi i Falelatai ē na faate’a”. O faaloaloga a le nuu e iai le tofi taitaifono ma le alii matua sa tauaveina e le afioga ia Anae Pita ma i latou na faatete’a, e lē aiāina e le faamasinoga lea tulaga.
Sa faailoa e Nanai Faamanu, sa matagofie mea uma ina ua aumai le afioga i Aiga i le aso o le a faatino ai le faaa’ega ma faatino loa. O le toe foi atu ai o Anae Pita i le nuu sa toe fono ai le aiga Sa Anae, o mataupu o lea fono e aofia ai le manao e toe foi Anae Pita i le tofi. O lea taimi o loo seei lava le afioga ia Anae Mati i le faaaloaloga o le aiga Sa Anae.
Na iu le fono a le aiga ma ua autasi uma le aiga o le a toe seei Anae Pita i le alii matua o le aiga, toatasi le matai sa faasala ese, na lei manao e faailoa lona igoa, ae sa ia faailoa… “E lē o amiotonu le mea na fai ona sa tatau pea ona faaauau le tofi o le afioga ia Anae Mati o lea e seei i lea taimi, peitai ua moni ai upu a le atunuu ‘Ua i fale le matega’.
Sa teena e le nuu ina ua logotala i lea tulaga, i lo latou talitonuga e tatau ona tausisi i le iuga a le faamasinoga. O le faaupuga e pei ona ta’ua e Nanai Faamanu o loo faapea mai ai le faaiuga, “O le filifiliga o faaaloaloga e filifili e aiga taitasi, ona momoli lea i le nuu, o le nuu e faamamaluina ma aloaia”.
Saunoa Nanai o le faauigaina, e aumai e silasila i ai le nuu, ma e i le nuu foi le faitalia e faamamalu ai pe aloaia le tofiga, peitai o loo finau mai ai Anae Pita ma ia faapea mai, e lē o le uiga moni lena o le faaiuga.
Sa fono le nuu e saili le tofa i aiga i le tulaga ua tulai mai, ma le manatu e faatali le Afioga ia Anae Pita seia tasi aiga ona avatu lea o le afioga e pei o faavae na masani mai ai Falelatai, peitai e lē o lea le mea na tupu. Saunoa Nanai Faamanu, e faate’ia le nuu o loo pati le ‘ava o le taeao fesilasilafa’i o aiga, ae oo atu le afioga ia Anae Pita ma fealua’i i totonu o le fale.
“O le ala lea na faia ai loa le faaiuga a le nuu e faatete’a Anae Pita ma Anae Mati” O le Aso Toonai na mavae atu sa talo fono ai le Aiga Sa Lupematasila e ala i le afioga i le faaaloaloga ia Lupematasila Talatonu Sila Vaa. O le uiga o lea fono ia toe faalelei le nuu, tuu ia fatia ua sola, ae toe faalelei ma faaaogā pea ia le alii matua o Anae Pita, sa faia lea tonu ma agai loa le avea’i.
E oo atu matai, ua lē o tulaga lelei foi le mataupu a Anae Pita ma lona aiga Sa Anae. Na ta’ua e Nanai Faamanu, sa saunoa Anae Mati, ua talanoa atu Anae Pita e o atu loa e fai lo latou nuu, aua ne’i toe foi mai le aiga i le nuu ae fai loa le nuu o le aiga Sa Anae.
O le tulaga la lea na ta’ua sa tetee ai loa Anae Mati ma isi matai o le aiga, e lē o se tulaga lea e tatau ona fai, o Falelatai e tasi lava. O lea lava aso na toe foi mai ai Anae Mati ma isi matai i le nuu ma ua faaaogā nei la le alii matua o le Afioga ia Anae Mati mo le aiga Sa Anae.
O se mataupu sa saili ai se faatalanoaga ma le Afioga ia Anae Pita i le afiafi o le Aso Sa, i le naunautaiga e fia fesiligia sona finagalo i le mataupu ua tulai mai. O ia o se tasi o tamalii ua leva foi taimi o avea ma faamasino o le Faamasinoga o Fanua ma Suafa. O nisi o itu o loo ta’ua i faamatalaga sa agai i ai lana galue, e pei o le faamamaluina o tu ma aganuu a Samoa, o le tausia o le filemu i aiga, atoa ai ma le usitaia o poloaiga a le faamasinoga.
O le isi itu tāua pe aisea lava e mafua ai lenei vevesi ua tele aso o vevesi ai, ua lē o le nuu i ona nofo suafa ae o ta’ita’i lava, pe o iai se mea e lē o manino ma iloa lelei e mafua ai pea lona naunautaiga e foi i le tofi o le alii matua. Atoa ai la ma le saili pe moni faamatalaga e pei ona maua mai le nuu. Peitai sa tali mai lona alo, e lē o fia manao le toeaina e fai mai sona manatu i le mea ua tupu, e lē o toe manao foi e toe faavevesi le mataupu.