Namulauulu Tofiga Tuigamala (sei samasama) ma nofo uma ile suafa Namulauulu i Fogapoa

Namulauulu Tofiga Tuigamala (sei samasama) ma nofo uma ile suafa Namulauulu i Fogapoa

Ua leva ona ou ola ma taumafai si o’u aiga mai lava i Niu sila se ia oo mai i Ausetalia nei lea ua avea ma nuu ma aiga o si a’u fanau ma nai a latou fanau.

E le’i faogofie ae o le alofa ma le agalelei o le Matai sili i le lagi ua mafai ai ona sapai manuia pei ona ‘ae’ae nei, ae sa le mafai ai ona galo le faasinomaga a nai o’u matua i o’u aiga, aemaise foi o le mau tauave a Samoa e tele aa o le tagata nai lo laau. O nai taimi ou te malaga ai i Samoa e tele lava ina osiosi pea la’u tautua faaauau i o’u aiga ona ua leva tausaga talu ona fai i lagi le folauga a nai ou matua, e pei lava o le toatele o nai o tatou tagata, e fai pea le tautua ma osi aiga e pei ona faatonutonu folau mai e nai matua ma tuaa ma.

  O le amataga o le tausaga nei i se tasi o a’u malaga na feiloai ai ma nisi o tamalii o aiga o si o’u tama mai Salafai ma talanoa mai ai mo sa matou nofo ona ua leva ona maliu si o’u tama e lei toe nofoia ai lava le nofoa, sa mamao ma o’u manatu sa latou silasila mo a’u, o la’u tali sei ou talanoa i la matou faletama, ae o la latou saunoaga, o oe o loo faia ma faaauauina le tautua talu mai si ou tuaa e tatau ma onomea lava foi le tofi mo oe.  O le aso 30 la o le masina talu ai, na osi ai le feagaiga a le Aiga sa Malietoa Taulapapa ma Moananu ma le aiga Sa Namulauulu i Fogapoa Safotulafai, o le malae o Ootuli i Fogapoa sa faapaiaina ai a matou nofo ma nisi o o’u tuagane ma tamalii o si o matou aiga i le suafa Namulauulu, o lota lava olaga o Fasitoo Uta ae o lea ua ta inu i manuia ma le suamalie o le tautua fai i aiga. I le agaga faaaloalo ma loimata o le agaga faafetai, e fai ai a’u ma sui o nofo uma sa fai mai Niu Sila ma Ausetalia, matou te momoli atu le faafetai tele i tamalii o tausia le aiga Namulauulu Tiumalu i Fogapoa, fetalaiga Namulauulu Ene, Namulauulu Sefo, Namulauulu Tavita ma suafa uma o lo tatou aiga, mo la outou faaaloalo aemaise o le faaeaea.