E fitu tausaga le matua o le alii o Jerriah Faasisila Tiatia Halefoti, o loo taaalo nei i le lakapi liki i tamaiti i lalo o le fitu tausaga le matutua, i le kalapu a Pakuraga. O le kalapu lenei e toatele lava i tamaiti palalagi ae ai filofilo ai ma nisi o alo ma fanau o le Pasifika aemaise lava ia Samoa. O le alualu pea i luma ma le malosi o le taaloga lakapi liki i le taimi nei i totonu o Niu Sila ua vaavaai ai matua ma aiga o le isi lea lumanai manuia o fanau mo le agai i luma. O le kalapu foi lenei i Pakuraga, o le tasi lea kalapu o loo alualu i luma le lelei o latou tama taaalo aemaise lava i le lelei o ana polokalame o loo faafailele ai fanau laiti aua le faatinoina o le taaloga lenei o le liki.
O Jerriah Faasisila Tiatia e fiafia tele i le taaloga lenei aua e fai mai ia e faalusi ai lona tino, ma o se taaloga foi ua fiafia tele iai ia i le taimi nei. O le lagolago malosi a ona matua ia Tiatia Halefoti ma lona tina ia Sau Evelyn Mapuilesua o loo tuu atoa iai le selau pasene i le taaloga a lo laua alo, aua ua iai le talitonuga i o latou loto e tupu le fiafia o fanau i taaloga pe a vaai mai o loo iai ma le lagolago o matua e fesoasoani i fanau i le taimi e faatinoina ai taaloga.
O le tele o aso Toonai e faia ai nei taaloga e mulimulitai ai lava ma nei matua i le momoliina o le atalii i ana taaloga. O le faamaeaina o le taamilosaga a le kalapu a Pakuraga i lenei taamilosaga, na tufatufaina ai loa faailoga mo au a kalapu taitasi sa tausinio i totonu o le kalapu liki. O le aotelega o tuufaatasiga o taaloga ma faailoga sa maua lea e le kalapu mai Pakuraga lea o loo taaalo ai le alii o Jerriah Faasisila Tiatia faatasi ai ma lana ipu sa maua i le tamaititi sa maua le taaalo lelei o le tausaga ma tele ana sikoa i le taamilosaga. Na ausia e lenei alii o Jerriah sikoa e lima i le taaloga mulimuli faatasi ai ma ana sikoa e tolu sa maua i le isi taaloga a le kalapu i Pakuraga i tamaiti i luga i le valu tausaga lea sa alu foi le alii lea faalava le au ina ua manaomia mai e le faiaoga e alu atu e taalo i lana au i luga.
O le faamanuiaina ai o le alii o Jerriah Faasisila i nei faailoga na ia fai ai loa i ona matua, a manuia ana taaloga i le lumanai o lea ia faatauina se fale e nonofo ai ona matua, a leai ua faatau se vaa fagota mo lona tama. O se moemitiga ua taoto nei i le loto o le atalii ina ia ausia lea matatia mo lona lumanai manuia faapea ona matua ma lona aiga.
Ua faamautu foi i lagona ma manatu o matua lea moemitiga a le fanau ina ia taunuu ma le manuia, ma le laua galuega e faia pea i aso uma o le tatalo ma tuu atu le fanau i le Atua ina ia manuia o latou olaga i le soifuaga i le tino ma le agaga. Ua malosi foi lo laua lagolago i taaloga a le laua alo aua le taleni ma le meaalofa ua tuuina iai e le Atua.
O Jerriah Faasisila Tiatia e mai le afioaga o Gataivai, Salani ma Vailima, o se alii e fiafia i le lotu ma le aoga aso sa, aemaise o ia le tamaititi laititi o loo faaaogaina i totonu o le aufaipese a le latou ekalesia e ala lea i le iliina o le pu.
