O tausaga uma lava e faataunuuina ai le Sulufaga i le Koluse Paia a le ekalesia Samoa Katoliko i Papatoetoe le Holy Cross, i lalo o le taitaiga a le afioga i le Peresetene ia Matauitaua Falenuu Moasili ma lona laulau, ma le naunautaiga o lea faamoemoe ina ia aua nei motusia le saili o aiga lotu ma tagata o le ekalesia Katoliko i le Koluse Paia aua o le tali lea o mea uma. Pei ona saunoa ma faamalosiau le afioga ia Patele Iosefa Euese sa fai ma ositaulaga o le Misasa i le taeao o le aso Toonai ua mavae, o a mea faigata o a faafitauli ma mea e tutupu i lenei olaga e tali mea uma i le Koluse Paia. Ma e tatau foi la i tagata kerisiano uma ona latou iloa ma talitonu e leai se mea e faigata i le koluse o le tatou Faaola.
E lagona e tino ma le loto le lelei o Iesu Keriso aua o mea e faigata ma le lavelave i le olaga, ae sa mafai mea uma ona o le faatasi mai o Iesu le Faaola, o lagona ia a’o molimau ile faalogo le matagofie o le Misasa pese, lea sa faailoga ai le Sulufaga o le Ekalesia Samoa i Papatoetoe. E mo le silafia, o le Misasa pese, e lagi ai e le aufaipese tali o le Misasa, e fatalia’i ai ma le afioga ia Patele o loo ia peseina foi tatalo o le Misasa.
I le matagofie o le Sulufaga i le Koluse Paia i lenei tausaga, ona ua aulelei tagata uma o le ekalesia i le latou toniga sa laeiina i le taimi o le sauniga mai lava i tagata matutua seia oo lava i fanau talavou ua laei uma i le toniga ona o le naunautaiga o le laulau a le ekalesia e tatau ona tofusia uma tagata ma le laei aua le faamatagofieina o le tapuaiga aemaise i soo se mea e malaga faatasi iai le ekalesia Katoliko Samoa Papatoetoe
O le tele foi o polokalame tuufaatasi i Malaeola o loo galulue iai lenei ekalesia e tatau lava ona iai se toniga e toniga tasi uma iai le aulotu, ma o le mamalu foi lea ma le matagofieo le tovine a le Atua i le Holy Cross i Papatoetoe. O le galulue faatasi i le loto e tasi o tagata uma sa faafaigofie ai mea uma e ala lea i le saili lava o le tagata i le faatauina o lana toniga.
I le taimi o le taulaga na tofu sao uma ai itu tino taitasi o le ekalesia i le faatinoina o lea sauniga, e pei ona galulue ai le aoga aso sa i le saunia o le tatalo lautele, o le autalavou sa gafa ma le faatalaleleiga, mafutaga a tina na saunia le taulaga ma le aufaipese sa feagai ma le Tusi Paia.
Na maea le sauniga ona faaauau lea o le mafutaga a le ekalesia ma Ositaulaga i le taumafataga sa faia i le latou hall i le Holy Cross i Papatoetoe, ma faia ai nisi o polokalame o le aso.
O le tofa ia Fualau sa fai ma sui o le ekalesia e momoliina se faafetai i le Ositaulaga le afioga ia Patele Iosefa Euese faatasi ai ma se tasi o Ositaulaga Tonga sa o la vaavaalua ile osiaina o le taulaga paia o le Misasa.
O le tofa ia Nunu Faasina Kepaoa sa momoliina ni meaalofa teu tusi i auauna a le Atua e talimasineia ai le laua galuega sa fitaituga iai i le aso. O le laulau a le Ekalesia Katoliko Samoa i Papatoetoe.
Peresetene – Matauitua Faalenuu Mosili
Sui Peresetene – Nunu Faasina Kepaoa
Failautusi – Sui Lili
Teu Tupe – Uputaua Popoalii
Faipese – Tamausu Faalepo Vaotuua
Taitai Pese – Taupau Fetulele
Sui Taitai Pese – Taii Sefelino
Tue Tupe aufaipese – Semau.
