Tusia: Ame Sene – Samoa
O le tea i tua mai i le Kolisi i Malua o se tasi o alii aoao, o ia foi o le peresetene o le tausaga faaiu a le Kolisi Faafaifeau i Malua, o se mataupu ua faate’ia ai le aulotu EFKS a Si’utu i Savaii, ona o le leai o se malamalamaga i le mafuaaga ua ala ai ona faatea faafuasei le alii A’oa’o mai i le Kolisi i Malua.
O le Susuga Nuufaigata na au mai i le Kolisi Faafaifeau i Malua, mai i le aulotu EFKS a Si’utu ma o le mitamitaga o le aulotu, le au mai i Malua o le Susuga i le A’oa’o.
Peitai ua savalia nei i le tolu vaiaso talu ona tapena mai i tua le alii A’oa’o.
O le mafuaaga, ona fai mai ua liu lotu le Ekalesia Si’utu, ua lē o toe lolotu i le EFKS e pei ona masani ai.
O loimata maligi ma lagona faanoanoa, ma le loto ua faate’ia na oo i le aulotu, ona e leai se manatu o le a agai se faaiuga a le eklaesia i le tulaga e pei ona tulai mai i le A’oa’o ua faamalolo nei.
Ae o le tulaga aupito sili ona faanoanoa ai, ua aafia ai ma tamafanau a le aulotu ona o le feseeseaiga ma vesiga i le va o le faletua o le aulotu Si’utu ma le faletua o le faifeau toeaina o le pulega.
O lona uiga e tolu lava vaega autu ua aafia, ua aveese uma tofi faifeau o le faifeau EFKS Si’utu, tapena i tua ma le kolisi le A’oa’o a le aulotu na au mai i Si’utu i le Kolisi Faafaifeau, atoa ai ma le aveese o le aulotu mai le pulega.
E ui e lē o malilie i ai le aulotu, ona o loo faaauau pea ona mulimulitai i tulaga tau a’oa’oga a le Ekalesia, ae i totonu lava ia i faamaumauga aloaia a le Ekalesia Aoao, e lē o toe ta’ua o se tasi o falesa o le pulega.
Peitai na faaalia manino e se tasi o le Ekalesia, Gafo Maleko, na faaauau pea a latou sauniga, peitai ane o le toe avatu o le tusi a le Ekalesia i le vaiaso talu ai, ua tatau ona tatala le feagaiga ma le faifeau, o se mataupu na faaalia ai lo latou teena ona fai mai o le mea patino lea a le aulotu ma e pule foi le aulotu pe tatala le feagaiga.
Ae na atili ai ona fetagisi le aulotu, ona e momoli atu le tusi o loo avatu ai le faatonuga malosi e tatala le feagaiga, ma le faaupuga e tatala le feagaiga ae a toe mananao i ai le aulotu ona toe aami lea.
“Matuā ou ofo, o se faiga lē alofa, faafefea ona fai mai lea tala, a tatala e tatala i saogatupe ma le anoano o mea, a toe faaa’e o le mea foi lea e fai, e toe faaa’e i tupe, se ou te ofo.” Ae na atili ofo le aulotu ina ua tutū atu le A’oa’o, ua faamalolo e le Kolisi Faafaifeau ona ua fai mai ua “liu lotu.”
Fai mai Gafo, e leai se faamatalaga mai i le alii A’oa’o, pau le tulaga na avatu e lua tuutuuga na tuu i le A’oa’o Malua, o le toe lolotu uma o lona aiga i le Ekalesia EFKS, ma ia toe foi o ia i le Ekalesia EFKS.
“O tuutuuga na, ou te lē iloa la i le A’oa’o Malua poo ua toe tafa lona finagalo i tuutuuga e pei ona faailoa i le A’oa’o Malua.”
Na taumafai atu le tusitala i le ta’ita’i o le Komiti o le Autoeaina, le Susuga Tavita Anesone, lea na ia faaalia, na “faatalanoaina le mataupu lea i le fono a le Autoeaina, ae sili ona fesili sa’o pea i le Failautusi Aoao o le Ekalesia, Susuga Vavatau Taufao, ona o ia le fofoga o le Ekalesia ma e na o ia e mafai ona talanoa mai i le autusitala.
Na fesiligia foi le Failautusi o le Ekalesia i le mataupu lava lea e tasi, peitai na saunoa Vavatau, o ia e na te lē iloaina le mataupu ona sa malaga i Fiti, na te lē iloaina poo ā mataupu na faatalanoaina i le fonotaga a le Autoeaina.
Na fesiligia foi le pule o le Kolisi i Malua, Susuga Maafala Lima, lea na ia faaalia, e tauala i lana failautusi, o faamatalaga e uiga i le mataupu e faalilolilo pe confidential ma e lē fai mai i ai sana faamatalaga, se’i vaganā ai, o loo malamalama lelei itu uma i le mataupu, ae o nisi faamatalaga e lē mafai ona aumai i le tusitala.
E lē o fia talanoa foi le A’oa’o e ui ina taumafai atu i ai i le telefoni mo se faatalanoaga i le mataupu.
