Malumalu EFKS Si’utu Savaii

Tusia: Ame Sene – Samoa

O lagona ia ua totō i loto o le aulotu a le Ekalesia Faapotopotoga Kerisiano a Si’utu i Savaii, ina ua toe maua atu le isi faaaliga mai i le Ekalesia Faapotopotoga Kerisiano Samoa i le autoeaina talu ai nei, ua tatau ona tatala le latou feagaiga ma le Faifeau.

Fai mai le matai faiupu o le aulotu EFKS a Si’utu, Gafo Mareko, ua tutuli ese latou e le Ekalesia, o lona uiga o lea faamatalaga, ua faasā ona toe faimea i le pulega, ma ua faasā foi ona toe ta’u latou o se ekalesia EFKS.

O le mataupu lenei ua leva ua savali i le tolu tausaga o fefaloa’i ai faapea le aulotu EFKS a Si’utu ma le Ekalesia Aoao. O le silasila a le autoeaiina e pei ona faailoa i le Ekalesia Si’utu, e tapena i tua, ma e lē toe avea le aulotu lea ma se itutino o le talitonuga faa-EFKS, seiloga ua tatala le latou feagaiga ma le faifeau ma lona faletua lea o loo galue ai nei.

E lata i le 30 le aofai o matafale o le aulotu, o le aofai foi lea o le aulotu ua tasi moemoe lo latou manaoga, e teena le finagalo o le Komiti o le Autoeaiina, o le tatala o le feagaiga ma le faafeagaiga ma le faletua.

“E matuā mamao lava le aulotu ma le mea la ua aumai e fai, e leai se mea faapena, e matuā matou leai atu lava faamolemole i le finagalo o le ekalesia, e lē tatalaina le matou feagaiga ma le matou faifeau.”

Na faaalia manino e le Susuga Gafo Maleko, talu ona mafuta ma le latou faifeau, ua seāseā ona toe faalogoina le iuleo o le oi, ma le siuleo ua masani ona faalogo ai i le toatele o sui o le aulotu o le “faimea so’o.”

Fai mai le Gafo o le masani a le latou faifeau, o le amataga o le tausaga, e taofi uma e le faifeau alofa, o lafoga e masani ai itutino o le aulotu, ona o le finagalo o le faifeau, e ave le faamuamua i pili aoga ma tapenaga a le fanau aoga, i le toe a’e o aoga.

“E faapena foi i le lotu tamaiti e faasā e le faifeau le soona avatu o toonai, ma faasā foi e le faifeau ni lafoga, ma ni teuga sasalu a le fanau, o le ā lava le ofu o le tamaititi poo le teineititi e failotu ai, o le talitonuga a le faifeau, e fua i lana vaai i le malolosi o le aulotu.

“E oo i taulaga, e lē faamalosia e le faifeau, o le ā le mea e mafai e le aiga o lena.”

O uiga ia o le faifeau e ala ai ona mumusu le matou aulotu e tatala le feagaiga. “O le matou talitonuga, e pule le matou aulotu i le matou filifiliga, e pule foi matou pe tatala pe lē tatalaina le feagaiga, ae lē o le pule mai e le Ekalesia e lē oo i ai so latou malosi.”

“O le matou tali foi la lena i le tusi a le Ekalesia na aumai ia matou e faamalosia ai le tatalaina o le feagaiga.”

Na fesiligia Gafo i le mafuaaga ua ala ai ona tusi atu le Ekalesia faapea, auā e lē te’i te’i nonofo le Ekalesia, tusi fua le tusi i le aulotu ma faatonu e tatala le latou feagaiga.”O le mataupu na alia’e ina ua misa le matou faletua, ma le faletua o le faifeau toeaina o le pulega, na ala ona misi ona o seleni.”

I suesuega a le tusitala, o le misaaga, e mafua mai i saoga tupe a le mafutaga a tina. Ua lē fiafia le faletua o le toeaina i le lē atoa o saoga tupe a le mafutaga a tina Si’utu, ae na toe faaatoa lava i le taimi mulimuli ane.

Na malaga le faletua o le faifeau Si’utu i Niu Sila ina ua uma ona ave le latou saogatupe i le faletua o le toeaina, ae faalogo mai le faletua i Niu Sila, i le mamafa o saunoaga ma faamatalaga na lafo e le faletua o le toeaina i lana mafutaga. O loo tuua’ia le faletua o le toeaina i lafoga o upu malolosi, ma oo ai le ote a le faletua o le toeaina i le lalau o le tataa o le mafutaga a tina Si’utu.

Na toe taliu mai le faletua o le faifeau Si’utu, ma fetaui ma le fonotaga a mafutaga o tina o le pulega, ma ia faatuina ai loa le mataupu ma i’u ina faatetele le vevesi.

Na faaalia e Gafo, e tuufesili lona mafaufau pe aisea ua ala ai fua ona aafia le faifeau. E mae’a le laumoli a faletua, ae alu atu le aveai, ua faalēaogāina uma tofiga o le faifeau, ma ua tatau ona tatala le feagaiga.

Na alu le ifoga a le faifeau ma le faletua ma faatoese i le faifeau toeaina ma lona faletua peitai, e lei taliaina. Na toe omai toe o atu le ifoga a le faifeau, faletua ma le aulotu e leai lava. Na iu lava ina o uma le ifoga a le afioaga, ua aofia ai ma faifeau a isi ekalesia, ae sau lava le tali e lē taliaina.

Ua maua foi le aveai e tapena i tua ma le pulega. O loo faaauau pea lotu ma sauniga a le afioaga, ae ua lē toe logoina lava i ni mea a le pulega.

O le taimi nei, o loo faagaioi pea le aulotu o le aulotu EFKS e ui ina ua aveese mai i mea fai a le pulega.