O le faaiuga o le vaiaso na tea nei na taula ai ni vaafagota tetele se lua i le uafu i Apia. O se atinae tele o lea faatoa faalauiloa e le Malo ae o lea e faaauau foi finauga i le atunuu ona o le popolega o le mamalu lautele i le soona faatau atu e Samoa o laisene i vaafagota a atunuu tetele e fagotaina ai ogasami faatulafonoina o Samoa.
O le tele o atumotu o le Pasefika ua faia lea tulaga ona o le tupe tele o loo maua mai ai ae o ogasami o loo tele lava faamanuiaga o loo latou maua ona o le tele o ogasami faatulafonoina ua o latou pulea o atunuu ia e i le itu i Sisifo o le Pasefika, lea e aofia ai vaega o le atu Maikeronisia ma nisi o atumotu agai mai i Saute e pei o Papua Niu Kini ma le Atu Solomona ae o Sisifo i le Atu Malesala, Nauru, Kiripati ma Tuvalu.
O le itu i Saute lea e iai Samoa e laiti lava o latou ogasami faatulafonoina ma ua ese foi la le agai a Samoa e saili se tupe maua ona o Samoa lava e aupito laitiiti lona ogasami faatulafonoina poo le EEZ.
A o agai ai atunuu tetele ogasami e ao seleni i laisene o vaafagota o atunuu tetele, ua ese feutagaiga a Samoa ua fai, ua agai e tatala ona uafu mo le taula ai o vaafagota mai i atunuu tetele nei ona o le manaoga e saili uafu o le Pasefika e mapu i ai ma fufulu ai le i‘a maua, ae o aiaiga o lea faatagaga ua saili ai e Samoa avanoa faigaluega o auvaa ma le au tautai i luga o nei vaafagota aemaise o le tuutuuga e fufulu ma tuu aisa e Samoa i‘a nei ae vaelua tutusa ai foi ma vaafagota nei.
O le faaiuga la o le vaiaso na tea nei na taunuu mai ai loa ni vaafagota tetele mai i se kamupani vaafagota mai Thailand.
O le ‘afa o i‘a tuu aisa nei ua ave i le Matagaluega o Faigafaiva ae ua tuu aisa e Samoa le ‘afa o uta mo vaafagota nei auā le auina atu i maketi o loo tuu apa ai le ‘asi‘asi lea e tele ai le faiva a nei vaafagota.
O le kamupani ua ta‘ua o le Luen Thai Fishing e ana nei vaa ma na amata lava i le faaiuga o le vaiaso lenei galuega tele o le tuu aisa o i‘a i pusa la‘uoloa ma lafo atu loa i kamupani i fafo latou te tuuapa ma faatauina.
O nei vaafagota e oo atu i le tai 3 masina o loo i luga o le moana, ma e moomia foi meataumafa a o iai i luga o le sami. O le isi lea avanoa na ta‘ua e le afioga i le Palemia, e tatau ona faaaogā e le au faifaatoaga e faatau ai a latou mea totō auā sa latou tupe maua.
Ona pau lea o le auala na ta‘ua e le Alii Palemia e ono maua ai se tupe a Samoa e tele mai i faigafaiva i le sami auā e leai ni vaafagota tetele e fia agai mai e galulue i ogasami o lenei itu o le Pasefika auā e lē tele ni i‘a e maua mai ai.
Ona pau la lea o le auala o le agai mai e taula ma tuu a latou uta auā e mamao tele Asia e fai ma foi i ai ae o le a fai uma atu i Samoa a latou galuega mo le faatau atu o le i‘a o a latou faiva i kamupani e tuuapa ai le i‘a o le tuna.
O ogasami la o loo faagogota ai nei vaa tetele o le isi itu lea o le Pasefika o loo faapea ona tele le tuna o loo maua ai.
