Ua mae‘a le vaiaso atoa o le polokalame faalauiloa a le alii taalo lakapi Amerika o Paul Soli‘ai atoa ai ma nisi o alo o le atunuu ua lauiloa i Amerika i lenei taaloga o le NFL.
O le iai o lea alii i Samoa o le unai lea o se polokalame ua lua nei tausaga ua faagasolo ma aofia ai ma Samoa o le faalauiloa o le taaloga o le lakapi Amerika ma le unaiga o le taumafa o meaai paleni ma le maloloina i fanau aoga. Ua tele tausaga talu ona faagasolo lenei polokalame faalauiloa e lea alo o le atunuu i tagata aemaise le fanau Samoa i le tele o setete o Amerika ae o lea ua lua tausaga talu ona aofia ma Samoa i lenei polokalame lea e faaigoaina o le Paul Soli‘ai Trust.
O le finauga a lenei alii ma isi tama taaalo o Samoa i le NFL i Amerika ina ia soifua maloloina fanau a le atunuu o loo nonofo ai i lea atunuu ma o lea ua oo mai ai lava i Samoa ina ia unai lenei faalauiloa. O le iai la o lenei alii ma lana aumalaga i Samoa na faataunuu ai loa ma se tasi o manaoga o lona aiga i le afioaga o Solosolo e faaee le suafa Leuluaialii i lenei tamafanau a le afioaga ma le atunuu.
O le suafa lea na faaee ia Paul Soli‘ai sa suafa ai lona tuaa ma le tuaa o lona tamā ma o lana faamatalaga, sa leai se mafaufau e oo i lea tulaga o le avea ma se matai o lona aiga peitai ua maliu lona tamā ae sa talanoa atu ia te ia e tautua le aiga tautua le nuu ma o le mafuaaga lava lea o le manatu e tāua le faaauau o lenei tautua auā o se tulaga talafeagai i soo se tagata Samoa. O le itumalo atoa na masii atu i Solosolo e molimau faatasi ma le afioaga lenei aso tāua mo lenei alii ma o se avanoa foi lea na maimoa ai foi isi alo o le atunuu na malaga faatasi mai ma lenei alii i se tasi o sauniga ua ave i ai le faamuamua i tu ma aganuu faa-Samoa.
O lapataiga ma faamanuiaga na folasia i le aso na amata mai lava i faafeagaiga o le afioaga seia oo i sui o le nuu ma le aiga o Leuluaialii. O le mau a Leuluaialii Paul Soli‘ai o le faaeaea ua avatu ia te ia e mautinoa ua faafiafiaina ai lona tuaa ua lagomau mai i tiasā.
O le afioga Patele Muliau Stowers na faapaia le nofo ma o fautuaga lava ina ia avea Leuluaialii ma taitai alofa i lona aiga ma le nuu ma faamanatu i ai le afioga Patele i le tāua o le talitonuga faa-Samoa, o le matai ua vaelua i ai mamalu o le Atua ma e tatau ona savali i uiga faale-Atua.
