O Setema i le tausaga ua mavae na seei ai Steve Hargreaves i le nofoa o le Puleaoga a le kolisi o Uesele (Wesley College) i Pukekohe. O lea faatoa savali i le 7 masina talu ona ia tauaveina mai le aoga i le tulaga uluaoga poo le pule, ae foliga mai o lea ua uma ona ia faataoto se sini autu mo le olaga aoaoina mo le lelei ma le manuia o le kolisi.
O Uesele o se tasi lea o aoga o loo tele ina sikolasipi mai ai tamaiti Samoa i tulaga tau taaloga aemaise lava o le lakapi, ae faapea foi nisi o tamaiti mai le Pasefika e pei o Tonga ma Fiti.
O le avea ai la o Steve ma puleaoga o lenei kolisi, ua ia manatu ai o se lu‘i pito sili ona maualuga pe telē i lona olaga galue pe a taunuu lenei faamoemoe. O lona naunautaiga ia toe faaolaola ma saga faaalualu pea i luma taumafaiga a fanau e ala i taaloga sa amata mai ai kolisi i aso ua mavae, ae se‘i toe siitia ai i luga ma le tulaga tau i aoaoga.
E 330 fanau aoga, ma ua lauiloa lenei kolisi o se nofoaga sa faafailele mai ai le tele o fanau ua lauiloa ai isi atunuu i le tulaga tau i lakapi faavaomalo, o afeleti ma isi lava taleni, ae ua malomauina ai i le tele o tausaga ua tea le leaga ma le faaletonu o ripoti poo suega a le fanau i le NCEA ma le ERO suega mo le ulufale atu i le Iunivesite.
Saunoa le pule aoga ia Steve Hargreaves, o le faailoga maualuga ma le atamai, e tatalaina ai le avanoa i galuega ma taleni eseese mo le lumanai. Ia tatau ona tatou galulue faatasi ina ia ausia e le fanau nei sini autu.
Talu ona tulai mai le alii pule i le amataga o le kuata, sa ia faamanino ai i faiaoga ma tamaiti aoga o lona manao ia siitia le tulaga tau i taaloga. Ua ia fuafuaina foi ia atoa le 30 le aofai o le aufaigaluega ina ia mafai ai lava e le faiaoga ia ona tuu atoa lona tomai ma lona iloa auā le atinaeina o le tulaga tau aoaoga ma taaloga mo le fanau.
Ua uma foi ona faataatia ni taiala i mataupu e pei o le Tusiata, Gagana lona lua (English) Matematika, ma le tala faasolopito (History). O le toatele o fanau aoga e tatau ona ausia faailoga maualuluga e faapei o tulaga tau i taaloga, o le saunoaga lea a le pule aoga.
O le susuga ia Steve Hargreaves ua 45 tausaga o lona soifua, sa avea ma puleaoga o le kolisi o Maclean mo le 13 tausaga, sa faiaoga foi i le kolisi o Otahuhu i nisi o tausaga a o lei see atu i lana aoga fou le Kolisi o Uesele e pei ona pule aoga ai. Sa avea foi ma faiaoga i se vaega ua faaigoaina “fai se suiga” (make a difference) ina ua mae‘a se galuega na iai i totonu o faafetauaiga, maketi ma mea tau tupe i le va o Niu Sila ma le UK.
O se tagata ua ia ausia ni faailoga maualuluga, i tulaga i pisinisi, aoaoga ae faapea foi le tele o faailoga na ia mauaina i mea tau i taaloga. Na ia faailoa mai ai, e lē o se taimi laitiiti o lea taumafai ai mo se suiga fou i le kolisi o Uesele.
O le toatele o le kolisi o tama aoga. Ae o se tasi o ana fuafuaga faataatia, o le taumafai e faatosina atu tamaitai aoga i vasega maualuluga, auā a toatele tamaitai aoga e faaosofia ai lagona o tama aoga ina ia ausia faailoga maualuluga i tulaga o aoaoga.
Na o le 11% o tamaitai, ae o le tele o le nofoaga o le kolisi e mafai ona ofi ai le isi 50 o tamaiti aoga. O le tele o fanau aoga e mai atunuu o le Pasefika ma Maori, o isi nisi mai Aukilani i Saute ma Sisifo, o nisi e mai Franklin County ma North Shore. I tausaga ua mavae na toatele ai fanau aoga mai Pakeha a o aso nei ua tau leai nisi.
Na saunoa foi le pule aoga ia Mr Hargreaves ua mae‘a ona faatulagaina le vaega e tatau ona iai le malamalama maualuga o le iloa o le tamaitiiti e tatau ona oo i ai, ae mo le taimi nei e lē o faamalosia tele le tulaga i aoaoga ae taumafai ina ia atinae ma aoaoina le tualga tau i taaloga.
Ua uma ona tofia taitai e 12, o ni tamaiti ua agavaa mo le taitaiina o le kolisi, o i latou foi o taitai o le atunuu mo le lumanai. I le taimi nei i lona manao, ia atagia mai i totonu o le olaga aoaoina taitaiga lelei.
