Ua i luma nei o le Palemia ma le laulau a fono a le Kapeneta se fuafuaga mamao mo le faatuina o se nofoaga e faafailele ai le aoaoina o alo ma fanau a Samoa i soo se taaloga poo se Sports Academy. O lea fuafuaga na afua mai i le taligamalo a le atunuu i taaloga lona 16 a le Pasefika na tapunia ma mae’a i le Aso Toonai 20 o Iulai 2019. O le saunoaga a le Palemia susuga Tuilaepa Lupesoliai Sailele Malielegaoi e tapuni ai taaloga na ia faailoa ai lea fuafuaga a le Malo i le naunautaiga e siitia i se tulaga sili ona maualuga le atiina a’e o soo se taaloga ina ia lava taoso ai ‘au masii a Samoa i taaloga faavaomalo e pei o taaloga a le Pasefika ma le Olimipeka faapea taaloga a Malo o le Taupulega.
Na faailoa ai foi e le Palemia i le tapunia o taaloga sefuluono a le Pasefika le tatau iai latou o loo taiulu i le SASNOC poo le faalapotopotoga o taaloga a le atunuu ona mataala i isi taaloga i le lumanai i le tapenaina o tagata e iai manaoga tumau o le tino e auai i ‘au taaalo a Samoa. O lea fautuaga e mafua i taaloga ua mae’a nei sa tauva ai nisi o tagata mai ‘au a le Pasefika e iai manaoga tumau o le tino lea sa ausia e nisi pine auro, siliva ma le apa memea. Na faailoa e le Palemia i lana talanoaga masani ma le leitio o le 2AP ao lei tapunia taaloga sa oo atu le Pelesetene o taaloga mo tagata e iai manaoga faapitoa le susuga Letaa ma faailoa atu le fia auai o nisi o tagata e iai manaoga faapitoa i taaloga a le Pasefika, ae peitai ina ua fesootai le Palemia i le faauluuluga o le SASNOC, sa faailoa ane ai ua le lava le taimi e tapena ai.
Talu ona amata tapenaga o le ‘au a Samoa e leai ma se leo o le SASNOC na faailoa ai e mafai foi ona tauva tagata e iai manaoga faapitoa i taaloga a le Pasefika, e leai foi se faailoa e le faalapotopotoga o taaloga a Samoa o loo iai nisi o ‘au masii mai mo taaloga a le Pasefika o loo auai ma nisi e iai manaoga tumau o le tino. I taaloga lava ua mae’a nei na fautuaina ai foi e le Palemia le faauluuluga o le fono faatonu o taaloga a le Pasefika ina ia silasila i le mataupu i le tauva o faafafine ua mae’a ona fai taotoga ma suia ai oni tamaitai i tauvaga o taaloga a tamaitai.
O le tuualalo a Tuilaepa e tatau ona vavae ese tauvaga a faafatama ma faafafine. Na faaalia lea fautuaga ona o le taaloga sisii uamea mamafa na pine auro ai se transgender mai Niu Sila ae manumalo le tamaitai tauva o Samoa o Feagaiga Stowers i le pine siliva. O le saunoaga mulimuli o le tapuniga o taaloga o le Pelesetene o le Fono Faatonu o Taaloga a le Pasefika lea sa ia faailoa ai o le a talanoaina le mataupu ma faailoa ai i se taimi se faaiuga. Ae o le saunoaga a Tuilaepa i le tapuniga lava o taaloga na ia ta’ua ai pe anafai e na te silafia semanu e avane sui o lana sosaiete o faafafine e tauva i taaloga ua mae’a.
