Le fale matamata fou

O le lamalama faaiu ai o le taligamalo a Samoa i taaloga a le Pasefika ae na filofilo mai ai i totonu ma le sauniga tele e tatala aloaia ai se tasi o galuega tele a le Faalapotopotoga Soka a le atunuu e ala i le tatala aloaia ai o le fale matamata autu mo taaloga soka faavaomalo e faia mai i le atunuu i le malae soka o le J Blatter i Tuanaimato i le Aso Faraile na tea nei. O le fale matamata fou lenei o se tasi o vaega o fesoasoani mai ai le faalapotopotoga soka a le lalolagi le FIFA mo ana paaga ina ia mafai ona siitia maualuga ai malae ma fale taalo mo le faamoemoe e faia mai ai nisi taaloga faavaomalo i le lumanai. 

E $1.5 miliona tala le tau atoa o lenei galuega e pei ona sa amata mai ai lona fausiaina i le masina o Novema o le tausaga na tea nei ma faamae’a ai i le ogatotonu o le masina o Iuni na se’i mavae atu nei. O le fale matamata autu lenei mo le soka e mafai ona nofoia e tagata matamata e oo atu i le 700, ae ese ai le isi vaega e faaaogāina e i latou e iai aafiaga tumau o le soifua, o loo iai foi ma potu faapitoa ea malulu i lalo ifo o le fale matamata e mafai ona sui ai au taaalo taitasi, o fale taele, o potu o le au faasalalau, o le potu e faagasolo ai le suesueina o sui taaalo taitasi mai i le tagofia ai o fualaau faasāina, o le potu fono faatasi ai ma le potu mo malo faapitoa (VIP).

Nisi o i latou sa auai i le tatalaga o le fale matamata fou

O le Minisita o Tupe, Sili Epa Tuioti na fai ma sui o le Malo o Samoa na saunoa i le saunoaga autu o lea faamoemoe e pei ona ia faafetaia ai le tumau pea o le lagolago a le FIFA i le faalapotopotoga soka a le atunuu. O le Peresetene fou o le soka i Samoa le susuga ia Papalii Samuelu Petaia na saunoa i le tala atoa o lenei galuega e pei ona ia faafetaia ai le taitai o lenei galuega atoa le susuga ia Asiata Van Wright o le Vikz Consultancy ma le susuga ia Suhren Cafarelli ma le Recon Constructions mo le faamae’aina o le galuega atoa aemaise ai o le tusia o le ata atoa o lenei fale matamata. Na auai foi i lea sauniga le faatonu o taaloga soka tau atia’e mo le Oceania, o le sui foi o le FIFA, faatasi ai ma sui taitasi o atunuu e 12 na tausinio ai a latou au soka i taaloga a le Pasefika. 

O se tasi lenei o taaloga o loo molimauina le tulaga lelei o ana polokalame tau atia’e mai i tausaga taitasi, aemaise lava o ana polokalame o loo faagasolo ai i totonu o aoga laiti, peitai o loo faailoga fesili pea le lumanai pe a oo ina matutua le tele o fanau soka, e faigofie lava ona liliu ese mai le soka ae agai atu i le taaloga o le lakapi. E lē o mafai ona faavaivai ai le faalapotopotoga soka a le atunuu i le faataunuuina pea o ana polokalame faataatia mo le atina’eina o le taaloga, o le tatala aloaia ai la o lenei fale matamata autu, e talitonu le toatele o i latou e fiafia i le soka, o se isi laupepa fou lenei mo le taaloga i totonu o le atunuu, aemaise o le itu o malae ma fale matamata.  O le maitau i ai a le tatou nusipepa, o le poloketi muamua lenei mo le pulega fou a le faalapotopotoga ua iai nei a’o tālia pea se faaiuga a le faamasinoga i le mataupu e pei ona iai nisi o sui o le pulega tuai o le soka.