O le Aso Sa na tea nei na faatoa manino mai ai sui e toalima ua saofaga atu i le sailiga siamupini o le Tauvaga Pese, o le Samoa Star Search 2019. O le aso 3 o le masina fou o Aokuso ua faamoemoe e faataunuuina ai lea sailiga siamupini i le fale taalo numera tasi (Gym 1) i Tuanaimato.
O i latou e toalima o le a saili mai ai se fetu o Samoa i le taleni o pese, e aofia ai le tamaitai talavou e 14 tausaga le matua, o lo o aoga nei i le aoga a Sagato Malia i Vaimoso, le tamaitai o Pelemomoeimanu Puepuemai mai i afioaga o Samamea i Fagaloa, Vaiusu ma Vailele.
O isi sui tauva e aofia ai le tamaitai ia Jireh Lemoa, o lo o aotauina nei i le Iunivesite Aoao o Samoa i le Papa-I-Galala, e sau mai i le afioaga o Samusu Aleipata, o le tamaitai ia Aberdeen Alai mai i afioaga o Leulumoega, Faatoia ma Tufuiopa, o le isi tamaitai e suafa ia Foaina Asovale mai i afioaga o Mulinuu ma Falelauniu faatasi ai ma le alii e toatasi ia Brandon Tino mai i le afioaga o Tafitoala Safata.
E 16 vaiaso atoa na faagasolo mai ai lenei tauvaga pese ma faasalalauina ai i luga o le TV1 Samoa i po o aso sa taitasi. O se tausaga ese lenei tausaga mo le tauvaga pese lenei pe a fua atu i tausaga ua tuanai, ona o le tele o tauvaga pese ua mae’a, e oo mai i le taimi o le sailiga siamupini ae ua mate’ia lava e le toatele le sui tauva e sola ma le manumalo peitai o le tausaga lenei, o lo o finau uma i latou nei e toalima mo le siamupini ma le faailoga muamua. O le manatu foi lea o se tasi o faamasino o lenei tauvaga, le susuga ia Tanuvasa Faamantu Solomona.
O le lona 16 ai lenei o tausaga o faatautaia pea le tauvaga pese lenei ma le faamoemoe e atina’e ai le taleni pese mo alo ma fanau a Samoa. E iai foi pine faamau o lenei tauvaga e pei ona tautaua ai nisi o alo ma fanau a Samoa i le taleni o le pese e pei o Vaniah Toloa, Iosefa Failua, Sam Chookoon, Emme Eteru ma nisi.
E iai foi le manatu maualuga o faamasino o lenei tauvaga i lenei tausaga, o le a maualuga le tulaga o le a oo iai le taleni a alo ma fanau na mafai ona tausinio ai i lenei tausaga. O le vaiaso lenei ua faamoemoe e toe agai atu ai sui tauva nei e toalima e tuuina mai faamanuiaga mai i o latou afioaga, aoga ma o latou aiga ao lumanai ai le sailiga siamupini i le aso 3 o Aokuso 2019.
O le tausaga na tea nei, na malaga mamao mai ai le aufaipese tautaua a le Punialavaa e faafiafia ai i le sailiga siamupini. O se tausaga muamua foi na manumalo tutusa ai nisi e toalua i lenei tauvaga e pei ona iai le tausaga na sei mavae atu nei. E lei faamautu mai e le komiti le polokalame mo le sailiga siamupini faatasi ai ma faailoga tupe, faatusa atu i le tausaga na tea nei, e $6000 afe tala Samoa le faailoga tupe mo le manumalo faatasi ai ma le tele o nisi o faailoga o ola na mafai ona sola ma le sui manumalo.
E molimauina lava i le tauvaga pese lenei i tausaga taitasi le tulaga maualuga o le lagolago a aiga, o aoga faapea foi afioaga o sui tauva taitasi, ma e le taumate o le tulaga lava e tasi o le a iai le tapena atu o sui nei e toalima mo le sailiga siamupini o lenei tausaga 2019.
[/et_pb_text][/et_pb_column][/et_pb_row][/et_pb_section][et_pb_section fb_built=”1″ _builder_version=”3.26.7″ custom_margin=”40px||||false|false”][et_pb_row _builder_version=”3.26.7″ column_structure=”3_5,2_5″][et_pb_column _builder_version=”3.26.7″ type=”3_5″][et_pb_blog _builder_version=”3.26.7″ include_categories=”current” show_author=”off” show_date=”off” show_categories=”off” show_pagination=”off” custom_margin=”||||false|false”][/et_pb_blog][/et_pb_column][et_pb_column _builder_version=”3.26.7″ type=”2_5″][/et_pb_column][/et_pb_row][/et_pb_section]
