Ou te manatu o se tasi lenei o mataupu maaleale i finagalo o le tatou Atunuu. E ui i lea, ou te faamalulu atu o le a lē ‘alo lava sa‘u faamatalaga.
Ua tele lipoti ma suesuega mai matagaluega a le Malo ma faalapotopotoga tumaoti e pei o le Salvation Army ma le Poverty Action Group i Aukilani, faapea univesite a Niu Sila ua faamanino mai ai, e toatele aiga Pasefika o loo ola matitiva i Niu Sila.
E aupito i sili lava le fuainumera o tagata Samoa i fuainumera tuufaatasi mo tagata Pasefika. O lona uiga e toatele tagata Samoa o loo ola matitiva i Niu Sila.
I le tausaga nei, e ui o le toatele o tagata Pasefika o loo faigaluega, ae e 30 pasene o le aofai o tagata Pasefika o loo ola faamoemoe i se penefiti mai le Malo. E le gata i lea ae o le toatele o tagata Pasefika o loo faigaluega i galuega e maualalo totogi, aemaise galuega e le o manaomia ai ni faailoga mai aoga maualuluga. O nei ituaiga galuega e leai se lumanai lelei e maua mai ai auā e tumau pea le maualalo o totogi o ia ituaiga galuega.
O loo manino mai foi i nei lipoti e aupito i sili lava ona maualuga le fuainumera o le autalavou Pasefika aemaise mai tausaga 15-24 tausaga le matutua ua lē o toe o i aoga, e lē o faigaluega foi, ma ua foliga e na o le ola faamoemoe i le penefiti mai le Malo poo le fesoasoani a latou mātua.
O Aukilani lava o loo afifio ai le toatele o tagata Pasefika ma e 72 pasene le aofai o tamaiti aoga o loo i aoga i Aukilani.
Mai faamaumauga a matagaluega a le Malo o loo faamau ai e 21.5 pasene le aofai o tagata Pasefika i Aukilani o loo ola i le penefiti mo latou ua leai ni galuega poo le ‘unemployment benefit’, ae na o le 7.5 pasene le aofai o fuainumera tuufaatasia o papalagi, Maori, Asia ma le Pasefika o loo maua lea penefiti i Aukilani lava ia. O lona uiga o lea e pito i sili lava ona maualuga le fuainumera o tagata Pasefika, ma e sili ai foi tagata Samoa.
Afai e tuufaatasia le fuainumera o tamaiti laiti ona maua ai lea o le 270,000 le aofai o tamaiti o loo ola i aiga matitiva, poo aiga o loo faaletonu tupe maua i aso faifaipea. Ua siitia lea fuainumera mai le 21 pasene mai le tausaga 2007 i le 2011.
E le gata i lea o loo faapea mai nei lipoti e 40,000 le aofai o le fuainumera o tamaiti i vaiaso taitasi o loo usu i le aoga e aunoa ma le faia o se meaai o le taeao poo le ‘breakfast’.
A o faamaumauga a le Matagaluega o le Soifua Maloloina o loo faapea mai, e silia ma le 83,000 le aofai o tamaiti i le va o le 5-14 tausaga le matutua o nisi o taimi ua fai latou meaai i le taeao faato‘ā usu lea i le aoga.
A o le tele lava o le taimi, e usu ia tamaiti i le aoga e aunoa ma le faia o se meaai o le taeao.
O loo faamanino mai foi i nei lipoti o le tamaititi e usu i le aoga e aunoa ma le faia o se meaai i le taeao e faigata i lea tamaititi ona faalogo ma malamalama i mataupu o loo aoaoina ai latou i le aoga.
O le faamatalaga a latou sa faia nei suesuega ua faapea mai, afai e leai se meaai a nei tamaiti e aafia ai le ola poo le galue o le faiai o le tamaititi, ‘it would affect their brain functioning’.
O le isi itu, o loo manino mai i nei lipoti, afai foi e fai meaai, o meaai e lē lelei mo tamaiti. Ua faamatala mai lava e tamaiti o a latou meaai o le taeao o le fagu suamalie e pei o le koko kola, poo chips, poo pai povi, poo keke, ma o nei meaai e atili ai ona maua tamaiti i ma‘i o le tino.
O loo lipotia mai foi o le tele o taimi o loo maua ai tamaiti Pasefika i ma‘i o le tino sa manatu e lē toe maua ia faama‘i i Niu Sila.
Ua manino mai ai e sili atu le fuainumera o tamaiti Pasefika o loo maua i ma‘i eseese o le tino i lo tamaiti Maori, Papalagi ma tamaiti Asia. O loo faamanino mai foi o le tele o taimi ua lē avea nei tamaiti e vaai le fomai e latou mātua. O nei faiga ua atili ai ona lamatia nei tamaiti i faama‘i e ono manaomia ai taotoga ma taofia ai i le falemai.
E tele naua mea o loo faamatala manino mai i nei lipoti o loo ta‘ua ai le tele o faigata o loo aafia ai le tele o tatou aiga. E le gata i tulaga ua ou ta‘ua i luga, ae o le tele o aiga ua lē mafaia ona toe togitogi aitalafu. O le toatele o loo nonofo i fale tuai e malulu, poo le faamoemoe foi i fale a le Malo.
O le agai i le kasino, o le ‘ava malosi o uiga uma nei o loo faamatala mai e nei mau lipoti. O uiga uma nei o loo faamatala mai o loo maua e aiga matitiva poo aiga o loo faaletonu tupe maua i aso faifaipea.
Afai e aupito i sili ona toatele le aumatitiva i le tatou Atunuu e tatau ona tatou galulue ina ia aua ne‘i iai se isi e ola mativa. O le faavae lava ua tatou masani ai o le o i le aoga tatou fanau ia maua so latou lumanai.
Afai ua avea lava Niu Sila ma tatou atunuu e tatau lava ona tatou iloa ola i Niu Sila. E tatau ona iai sau galuega mo le tausiga o aiga. E tatau ona iloa faavasega tupe maua ma faamuamua mea e tatau ona totogi muamua. Afai e leai se galuega, ua e lē ai. E maua le galuega lelei ma totogi lelei, pe afai lea o loo iai sau faailoga maualuga poo sou tomai faapitoa.
E maua e tatou fanau se lumanai manuia pe afai e toaga ma iu lelei a latou aoga. E toaga tamaiti i le aoga, pe afai e naunau i ai tatou nei o mātua.
Afai lava e leai so tatou naunau ia iu lelei aoga o tatou fanau, o lona uiga ua tatou ioeina ia ola tatou fanau i se tulaga matitiva i Niu Sila. Afai o lea, o le ā le autū poo le manulauti na tatou tuua ai Samoa?
