O le Aso Toonai 8 o Setema na faatumulia ai maota o le Ekalesia Metotisi i Kokiri ina ua osi feagaiga le susuga i le Faifeau ia Iose Semi ma le faletua ia Leafa ma la laua Ekalesia fou e pei ona tofia i ai e le Koneferenisi aoao a le Ekalesia Metotisi.
O le susuga lava i le Sea o le Sinoti ia Savaii Loto na taitai i le sauniga lotu i lea aso ma faasolo ai le polokalame e pei ona masani ai faamoemoega faapenei.
O le ‘ava o le feiloaiga na fetalai ai le fetalaiga ia Tautunu i le lauga usu a le sui o le Ekalesia i Kokiri, ae o le fetalaiga ia Vaasiliega Lagaaia na fetalai e fai ma sui o aiga o le faifeau ma le faletua, o le paia lava lea o le afio o Ti‘a ma Luamanuvae, afio Tinousi ma susū Su‘a ma le Malelega a le Malietoa faapea le mamalu o le Falefia ma le Falesalafai, le Lologa pule ma le Faito‘aga na lave i manino, Lave i Aava, tainane foi le Paia o le Aiga sa Tuala, le Fofoga o le vai ma le susū ai o Tanuvasa na itulua ai Aana ma le mamalu o le Faleaana, e faafetaia le alofi faatamaalii e pei ona sa alo i ai le Ekalesia.
Na mae‘a le ‘ava ona alo lea o le malotoga na feagai lea ma le fetalaiga ia Ti‘otala Taito Semi o le uso o le faifeau mai Ausetalia, na fetalai e momoli faaaloaloga maualuluga a le paia o aiga na lua mo le ekalesia. Na matagofie le aao malosi o aiga o le faifeau ma lona faletua e pei ona molimauina e le toatele o le atunuu ma malo eseese na auai. Na tofu sua uma le aufaigaluega faapea ma ofisa o le ekalesia. O palapala a malo foi na matuā faafetaia ai le aao malosi o aiga na lua i lo latou faaeaea ia latou taulaga tagata.
Ina ua oo i le Aso Sa na faapea ona toe faatasi atu le mamalu o aiga na lua e tapuai faatasi ma faamavae ia latou taulaga tagata faapea le ekalesia ma ina ua mae‘a le toonai ona fetalai loa lea o le fetalaiga ia Fiu Luamanuvae Sili e momoli le o‘o o le susuga ia Iose Semi ma le faletua ia Leafaitulagi Semi i le Sinoti a le ekalesia. O ie o le malo tetele lava e 20 ma le $10,000, faapea ma pusa pisupo e 30 ma le manu palagi o le toonai lea i le ekalesia.
Na fetalai le tofa ia Levaogogo Tiata na fai ma sui o le ekalesia e momoli le faafetai i aiga na lua ma foai le pasese e $2,000 faapea ma le $1,000 mo le sua ma le seleni (e lē iloa le aofai) mo lafo o le aiga.
O le toatele foi o aiga o le faafeagaiga na malaga mai i Aukilani, o isi o Ausetalia e pei o le susuga ia Tiumalu Semi na toalua mai ma Ti‘otala Taito Semi o uso ia o le faafeagaiga.
Ae avea ia lenei avanoa e faamanuia atu ai le Samoa Times i le susuga ia Iose ma le faletua e tusa o le galuega fou ua tofia ai mo le laumua e tautua le finagalo o le Atua.
O ata o lenei feiloaiga e avanoa atu i le vaiaso o lumanai ona o masini ua faaletonu. E faamalulu atu ai.
