I luga o le faamalama a le Vodafone, Facebook o loo faalauiloa ai lana auaunaga i le taimi nei, o le 4G ma le 4G+. 

 O le alii Palemia ma le Minisita o Fesootaiga Afamasaga Rico Tupai faapea sui o le pulega a le Vodafone

Peitai o loo felafoai manatu faaalia o le au fai telefoni, faasaga i le isi Generation le 5G lea ua iai masaloga e lē saogalemu mo le soifua o meaola ma laau, e aofia ai ma tagata.

I luga o Facebook, e iai foi le alii Samoa, Gread Tiitii o loo ia faia faasalalauga ma ia tuua’ia ai le matautia o le isi Generation, poo le 5G, i lona ia lava talitonuga i mea o loo vaai i  ai ma molimauina i Ausetalia. 

Peitai, ina ua fai le sauniga i Samoa e tatala aloaia ai le kamupani telefoni a le Vodafone lea ua suitulaga ai nei i le BlueSky mai le aso 4 o Aperila 2020, na atagia ai le mitamita tele o le ta’ita’i o Samoa, le afioga i le Palemia, Susuga Tuilaepa Sailele Malielegaoi i le oo mai ai i Samoa o le Vodafone o se igoa ua lauiloa i le lalolagi i mea tau telefoni ma fesootaiga.

  (Today I am proud to announce the arrival of the global brand, Vodaphone, into Samoa.) Mai lana saunoaga tapena mo le faalauiloaina o le Vodafone, ma tufa mai i ofisa faasalalalau e le ofisa o le Failautusi a le malo, o loo tusia ai i le gagana peretania ma faaliliu e faapea: o se tasi lea o fuafuaga a le malo, na faia ma le loto i ai, ina ia siitia tulaga o mea tau fesootaiga i Samoa, ma o nisi la nei o na fuafuaga. 

O le faatauga o le SamoaTel e le Blue Sky na faamauina ai o le meatotino pito telē lea a le malo na uluai faatau ese ma umia ai e le BlueSky le 75 % o le kamupani talu mai le 2011, ae avane le isi 25% e umia e le UTOS. O le UTOS lea a agavaa i ai tagata o le tatou atunuu e teu faafaigaluega ai a latou tupe, ma maua ai foi a latou faamanuiaga ta’i tausaga. 

I le saunoaga tusitusia lava lea a le afioga i le ta’ita’i o le malo, o loo faamauina ai, e 40miliona tala lea na faaalu mo le faasaoasaoaina o le auaunaga tau telefoni feaveai i Samoa, e aofia ai le silia i le 90 pou, ma le silia i le 30 Gigabits i le sekone poo le 30 piliona bits of data i le sekone, agai i le Tui Samoa. 

O le Tui Samoa o le laina telefoni lea o loo toso mai le ilititai, ua mafai ai nei e le Vodafone Samoa ona faatutusa lana auaunaga i atunuu ua mautu lo latou atina’e i le lalolagi. 

Mai le saunoaga tusia a le Palemia, ua fausia ai nei le Vodafone i le tomai faaonaponei, ma faaalu ai lana 6miliona tala i le masina lenei, mo le saga faasaosaoa atili ina ia mautinoa e ausia le Moto a le malo, “o le mea lelei i Apia e lelei foi i Savaii.” 

Lona uiga o le a tutusa lava le saoasaoa o le auaunaga tau telefoni i nuu i tua ma le taulaga. I lana saunoaga tapena tusitusia lava lea mo le tatalaina o le Vodafone, ua faapea mai ai foi le afioga i le Palemia, When this upgrade goes live, Vodafone customers will experience a next generation service. 

E tatala ane le Vodafone Samoa, ae ua maitauina foi e le alii Palemia, ua silia i le 60 atunuu ua oo i ai le auaunaga a le Vodafone ma le silia i le 640 miliona ana paaga. Ma atagia ai le ituaiga o oloa o loo galuea’ina e lenei foi kamupani telefoni. 

Ina ia saofagā uma tagata o Samoa i le auaunaga tau fesootaiga televavave, na faavae ai foi e le malo le Pulega mo mea tau fesootaiga lava faaonaponei, le Digital Transformation Authority, DTA, ma o le a gafa foi lea ma le isi laasaga o lenei auaunaga, mo le fausia lea o le poloka faapitoa mo le isi tupulaga o auaunaga faa-ITC i Samoa. 

O le DTA e gafataulimaina suiga o meafai a le malo, poo auaunaga mo suiga faanatinati, e pei o le faia o auala e maua mai ai avanoa faigaluega. I le saunoaga tusitusia a le Palemia, o loo ta’ua ai, e sili atu le maua o avanoa e tali atu ai i tagata o loo matata’u agai i suiga ua oo i ai le lalolagi i aso nei, na ia faapea mai ai foi, e manaomia lava ona tatou agaigai atu i suiga mo le lumanai. 

O le mea sili lava la, o le a’oa’o ia popoto uma tagata i soo se mea. 

Ma o le faalautele o le sootaga lea i mea tau telefoni, ma fesootaiga, e tupu ai ma ola ma maua mai faamatalaga, tau i le tamaoaiga o le lalolagi. 

Na agiga foi i le saunoaga tusitusia lava lea a le Palemia, le sao lea o le Vodafone i lana faigamalo, o le fesoasoani lea i ana meafai. Pei lea o le taulamua ai foi o Samoa i le Pasefika i mea tau fesootaiga telefoni. Ua maitauina foi le taugofie ai i le tami nei o fesootaiga, o se molimau ola foi lea i galuega e faia ma le loto i ai a le faigamalo, i le vaega o fesootaiga i o tatou tagata. 

E oo mai nei o loo tālia pea e le tusitala se tali mai le kamupani a le Vodafone, na fesiligia ai le 4G+ lea ua latou faalauiloa faatusa i le 5G. Ma o le a tuliloa foi le afioga i le Palemia, i le uiga tonu o lana saunoaga tusitusia, When this upgrade goes live, Vodafone customers will experience a next generation service.