Pe tusa o le tea o le 8pm i le po o le Aso Tofi o le vaiaso na tea nei, na vaaia ai e aiga o nonofo ai i Siusega le sasao ane o se afi tele i le vaega tonu o ia i le maota o le Afioga i le Minisita o Tupe Maua ma le Tiute, le Afioga ia Tialavea Fea Leniu Tionisio Hunt.
Na matuā faatumulia atoa lea nofoaga e ui sa poloka e leoleo le auala e agai atu i le vaega tonu na tulai mai ai lea mu tele. Na molimauina le tele o taavale a le Matagaluega o Leoleo, o taavale mai le Faalapotopotoga o le Malosiaga o Eletise faapea taavale a le vaega o le Tineimu. E ova atu ma le itula le umi na taumafai ai le tineimu e tau tineia lenei malaia.
Faaalia e le afioga i le Minisita ia Tialavea i le autusitala, pe tusa o le tea o le 8pm i le po a’o sauni ai le latou sauniga mo le Eseta ma lana fanau ma fanau a lana fanau, ae o latou faalogoina loa le pa’ō tele i le pito i tua o le latou fale lea na vave ona sasao ane ai le mumū o le afi ma fesootai mai ai i le tele o vaega o lo latou fale.
O le loto faafetai o le alii Minisita ona na saogalemu uma o ia ma lona aiga aemaise o si ana fanau ma fanau a lana fanau sa o latou iai faatasi i totonu o le fale i le taimi na tupu mai ai le mu. E moni ua faaleagaina uma meatotino ma le fale atoa ae faafetai i le Alii e leai se soifua na afaina ai faapea foi i latou na galulue e taumafai e tineia lenei mu, saunoaga lea a Tialavea.
O se tasi o vaega na ave i ai le faamuamua a le Tineimu ina ia taofia le sosolo atu o le mu lenei i aiga tuaoi aemaise ai o le malumalu tapuai o le Ekalesia Asofitu lea foi e sosoo ai ma le maota o le alii Minisita.
Na molimauina foi i le taimi na tupu ai lenei faalavelave le auai atu o nisi o Minisita o le Kapeneta e faamafanafana i le afioga ia Tialavea ma lona aiga mafatia. O le saoasaoa o faasalalauga i luga o upega tafailagi na muamua iloa ai e auaiga o le Minisita i atunuu e mamao ae lei fesootai mai i Samoa.
E oo mai i le taimi na tuufaatasia ai le tatou lipoti e lei mautinoa lava le mafuaaga o lenei malaia. Na saunoa le Ofisa Sili Lagolago o le ofisa o Tineimu a Samoa, susuga Tanuvasa Petonu Mauga, ona o lea sa feagai ai le atunuu ma aso malolo o le Eseta na tolopo ai le faatinoina o nisi o galuega suesue seia faataunuu i le vaiaso lenei.
Faamoemoe ia suesuega ina ia faatalanoa uma aiga tu tuaoi aemaise i latou na iai ma latalata i le nofoaga na tulai mai ai lenei mu.
O loo galulue faatasi le Pulega o le Tineimu ma le Matagaluga o Leoleo ina ia faatino suesuega i le mafuaaga o lenei faalavelave. E lē o mautinoa mai foi i le Alii Minisita pe o inisiua lona maota pe leai.
O le Afioga ia Tialavea Tionisio Hunt ua avea ai nei ma Minisita o Leoleo e suitulaga ai i le Afioga i le Alii Palemia ia Tuilaepa Sailele Malielegaoi talu mai ona toe tuufaatasia le ofisa o leoleo ma le Pulega o le Falepuipui i Tanumalala i le mae’a ai o le solaaga a pagota talu ai nei.
