O tuua’iga o le gaoi ua mae’a ona faia iai le faaiuga a le faamasino o le faamasinoga maualuga i Apia, faasaga i le alii loia, Pa’u Tafaogalupe Mulitalo, ua toe faai’u i le faamasinoga toe Iloilo, lea ua amatalia i le faamasinoga i Apia. O le vaiaso na tea nei, na finauina ai e le alii loia lana mataupu, ina ua toe apili e le ofisa o leoleo le faaiuga a le faamasino na faia ia Aperila o le tausaga nei lava.
O le mataupu e faapea o le galuega a le alii loia i le fauga o lona fale i Lalovaea e le pule o le kamupani e igoa o le ALCC Brown Construction, o Alapati Brown. O le galuega o se faleoloa ma le ofisa loia. Na tau faimalilie uma iai o le a faatino e le ALCC Brown peitai e leai se maliega i se tau o le galuega, ma lei sainia foi e le pule o le kamupani le konekarate na tuufaatasia e le loia mo le galuega.
Na faatino le galuega ma na amata i le tuu i lalo o se faleapa, ma ua auina atu foi masini a le kamupani mo le faatinoga o le galuega i le fanua a le loia mo le faatinoga o galuega a le aufaigaluega. Ua faasolo ai pea le galuega seia oo ina lē mulimulitaia e le tufuga tuutuuga o le pemita, ae ua usitaia le mea o loo manao iai lē e ana le galuega.
Peitai na toe taofi e le alii loia le galuega, ina ua vaai atu ua telē atu le fale nai lo le mea na fuafua iai. O le taofiga foi lea na faatonu ai e le alii loia le aufaigaluega e faasā ai ona aveese masini a le kamupani na faaaogā i le galuega. O le feeseeseaiga foi lea na faatonu ai e le alii loia le toe faafoi atu e le tufuga o lana tupe e $26,000.00 tala lea na totogi i le faiga o le galuega.
E na’o le $13,000.00 tala na faafoi ma le faamatalaga ua uma ona faatau ai meafale o le galuega.
Na toe sui le konekarate na faaauauina le galuega, ma tuua’ia ai le faaaogā e le konekarate fou, o masini a le ALCC o loo taofia pea i le fanua o le loia e faatino ai le galuega. Na ave le tagi a le alii pule o le ALCC i leoleo, mo le taofiga o ana masini e le loia, ma ua faaaogā foi e le isi konekarate fou, ma o le aso 19 o Novema 2015, na aveese ai loa e leoleo masini a le ALCC i se tusi saisai e tuvae ai leoleo i le fanua o le alii loia ma aveese mai masini.
I faamaumauga a le faamasinoga na ta’ua ai na faaulu le tagi a le alii loia faasaga i le alii faipisinisi peitai e lē o iloa tonu poo fea ua fai iai le tagi a Pa’u. O le faaiuga a le faamasino i le mataupu lava lenei na faaleaogāina ai moliaga o le gaoi faasaga i le alii loia, peitai ua toe oo i le faamasinoga toe iloilo le faaiuga.
I le finauga a Pa’u i lana mataupu na ia faaali manino ai i le faamasinoga toe iloilo, le lē usitaia e le itu a leoleo o le tuuina atu o pepa moomia e le faamasinoga toe talosaga i totonu o le vaitaimi faatagaina e tuuina atu ai pepa mo suesuega a le faamasinoga i lana mataupu. Fai mai Pa’u pe ana usitaia lea tulaga e tele lona taimi e tali mai ai i mataupu ua laga e le itu a leoleo e faatatau i le faaiuga a le faamasino ua toe apili e le itu a leoleo.
Saunoa foi le alii loia ina ua maua le faaiuga o lana mataupu, le aveesea o le masiasi na feagai ma ia i lona va ma isi loia ona o le ta’uleagaina o lona igoa i le gaoi.
E lē gata i lea ua leva ona faatau’au pepē ma lana mataupu lenei talu mai le 2015, peitai lea foi ua toe faaiu i le faamasinoga toe iloilo. Na ia faaalia manino, o loo silasila i le faaiuga o le tausaga lenei e tatau ona faaulu ai lana tagi faasaga i leoleo ona o le faatinoga o lana mataupu. O le vaiaso nei faatoa maua ai faaiuga a le faamasinoga Apili.
