Toalua loia ua sauni e lagolago le tetee a Matai e 16 o Malie

O le aso na tutulai ai Matai e toasefuluono o Malie ua tetee i moliaga o le lē usitai i le faamasinoga
O le aso na tutulai ai Matai e toasefuluono o Malie ua tetee i moliaga o le lē usitai i le faamasinoga

O le alii loia le afioga Faulalo Lefau Harry Schuster o loo tulai mo matai e toasefululima o Malie ae o le alii loia le susuga George Latu o loo tulai mo le afioga Faamausili Moli Malietoa e toasefuluono ai matai o le afioaga ua latou teena moliaga o le lē usitai i le poloaiga a le faamasinoga e taofi le faia o le Faanofonofo i le suafa Tupu o le Malietoa.

O le Aso Lua 16 o Oketopa 2018 na valaau ai mo le taimi lona lua moliaga a leoleo ma tuuina atu ai le tali tete’e a matai ua molia e mafua i le faaeeina o le suafa Malietoa i le afioga  Faamausili Moli i le masina o Aukuso o le tausaga nei.

O le masina o Mati 2019 i le aso 6 ua faatulaga o le a valaau ai molimau a leoleo ma molimau a matai e toa sefuluono ua molia. O taualumaga ia o le a faafofoga ai le faamasinoga i mau a leoleo e lagolago ai le moliaga o le lē usitaia o le poloaiga le tumau, ae o le a folasia ai foi ni mau a matai ua molia e faamatala ai le mafuaaga na latou le logosaia ai le poloaiga ae faaauau lava ona faatino le faanofonofo.

O le poloaiga a le faamasinoga e le gata na mafua i faalavelave na tuuina atu e nisi o suli o le suafa Malietoa e taofi le faia o le nofo sei maea le talosaga apili, ae sa iai foi le talosaga a le afioga Gatoaitele Savea Sano Malifa, na talosagaina ai le faamasinoga e ave se poloaiga ia Fata ma Maulolo ia aua nei faae’eina papa ona o loo ua nofoia le suafa Gatoaitele.

Sa faamanino mai e se tasi o suli o le aiga o le Gatoaitele, e lei autu le talosaga e taofi le faia o le faanofo Tupu ma o se isi lea o vala sa nenefu ai nisi ona sa faapea o se taofiga o le faia o le nofo. Sa auai le tapuaiga a le aiga o Gatoaitele i le aso na faatino ai le faamoemoe.

O le apili faasaga i le faaiuga a le faamasinoga o Fanua ma Suafa ia Tesema o le tausaga e 2017 na tofia ai Faamausili Moli e nofo i le suafa Malietoa, ua toe tolopo nei e fofogaina i le aso 6 o le masina fou o Novema. 

O le aso 9 o Oketopa 2018 sa faatulaga e valaau ai le apili peitai sa toe taunuu i le ofisa o le Lesitala o Faamasinoga o Fanua ma Suafa ni talosaga tuistusia mai nisi o itu o suli o le Malietoa e toe tolopo ona o nisi o mafuaaga le maalofia.