Ua faalauiloa mai ai nei le lisi o tamaitai e 100 o le lalolagi ua filifilia. Ona o le tu matila o o latou sao faalauaitele mo tagata lautele o le lalolagi. Ua agiagia mai ai le fu’a a Samoa i le lisi a le BBC British Broadcasting Corporation 2018, o Lonetona, e lona 15 mai ai i le lisi, le alo o Samoa, le tamaitai o Fealofani Bruun.
I le maitau a le BBC ma le latou faatatau i le faiga o lenei filifiliga, “o le fesoasoani a nei tamaitai o le lalolagi, o le a mafai ai ona oo atu sailiiliga i vaega eseese o le lalolagi e lei iloa, e aofia ai ma le faaaogāina e le tamaitai o lona ma’ema’eā e ausia ai manaoga faatino, ma fofo’e mai ai i fafo talaaga tanumia sa na’o se ataata i talaaga faasolopito.”
O le matutua o tamaitai mai lava i le 15 i le 94 tausaga le matutua, mai le silia i le 60 atunuu, o le lisi lea 100 tamaitai o le lalolagi a le BBC, o loo iai totonu, ta’ita’i, taimua, ma toa manumanu o aso uma. O nisi oi latou nei, e taulamua i le faalele ae taofiofi foi o latou lagona faatamaitai. Ae e iai foi tamaitai o lenei lisi o le toaselau, ua latou ausia matati’a e lē talitonuina e mafai e se tamaitai ona faatino. Pei o le tamaitai Peretania, na faaaogā lona taimi i le falepuipui e faatino ai se pisinisi na maofa ai tagata, ma le teineititi Afakatisitana, na semanu e faafesuiai i le tama Maori Niu Sila o Nanaia Mahuta, 22 tausaga o se faipule o le Palemene a Niu Sila, o se tagata ua logologā lana nofoaiga, ma lana finau i le aiā a tagata ma le tetee atu i sauaga. Peitai o le lona 15 ai o le igoa o se tamaitai Samoa i lenei lisi o tamaitai faitauina o latou sao i suiga o le lalolagi, o se tulaga na lagona ai le agaga maualalo o le Susuga a Fealofani. I le tala a lona tina, e masani ai lava, e lē o se tagata e gaoia, pe o se tagata foi e manao e faalauiloa ana galuega fai. E sue e le autusitala ma tagata faasalalau e lē gata o Samoa, ae o isi atunuu o le Pasefika ma le lalolagi e iloa ane ua taunuu iai. A maua ona taimi malolo, ona faamolemole lea i se tagata o lona aiga, e late o toalua e asi lona aiga i Savaii, tusa lava pe na’o se aso pe lua, ae o lana tala, o se tasi lena faasiligamalosi tele mo ia.
O le tausaga e 2009, na amata ai ona tautua e leai se leo leai se totogi, le tamaitai i auala e puipuia ai le siosiomaga o Samoa.
Ma o le isi auala na faatino ai lona manaoga, na faaauala atu i folauga i le Pasefika, ma galulue faatasi ai loa ma isi tagata folau o le tatou itulagi, e unaia le mau tauave, o le puipuia o le siosiomaga.
Sa toatele alo ma fanau a Samoa na latou tauasa faatasi maia le misiona lenei, peitai o le tupe lava e faamalosia’u ai le tagata ma le tamaitiiti Samoa e faatino se galuega.
Peitai sa lei muta le finau a Fealofani, e ui i le tele ma le anoanoai o lu’itau na feagai ma ia, ae sa galue lava mo le lumanai o tagata uma.
Mai le toso o le maea, i le sisi o le la, a’e i le faga ma le tila, fufulu le fola ma fili sosoo le maea, kuka ma faamamā ipu, faaola le afi, palama le faleui, asu le pakete, i luga o vaafolau o le Pasefika, e oo mai nei, ua avea o ia ma tagata e faia le faatonuga. O le avea ai o Fealofani ma tamaitai Samoa muamua e Kapetenia le Vaa Folau o Samoa le Gaualofa, e lē o se taunuuga na faigofie lona tauasa mai. Na talanoa ai lona tina, e pei lava o le nofo aiga, ma soo se galuega lava, e te faia. “O le ala i le Pule o le Tautua.” Ua savali i le 10 tausaga o galue fua lenei tamaitai e aputiputi le siosiomaga saogalemu o tagata uma.
I le taimi nei o loo i Samoa le Gaualofa, mo le tau o afā. O Fealofani, e sau o ia mai afioaga o Samauga, Lefagaoalii, Safotu, Sagone, Poutasi, ma Satalo Falealili.
