O tausaga e tele ua mavae sa na’o matai tama tane sa filifilia ai tofi Pulenuu o afioaga eseese o le atunuu, ae o aso nei i Samoa ua suia le tofi Pulenuu i le Sui o le Malo ma ua lē gata o alii ua umia suafa matai ua pale i le tofi, ae ua ofi iai ma le itupa o tamaitai.
O nisi o sui tamaitai ua matai a’o sui tamaitai o nisi nuu ma alalafaga e lei matai. O galuega a sui o le Malo o le faamaopoopo o le nuu ma fai fono ta’i masina poo le ta’i lua foi vaiaso e faamalamalama ai fuafuaga a le Malo e pei o le faamamā o aai, atina’e faatoaga, tausi le tumamā lautele i le asiasi o tunoa, fale ta’ele ma faleui, poo le fesoasoani i ni taumafaiga a matagaluega eseese o le Malo o loo atina’e ai nuu ma afioaga.
O lea ua tuusa’o i sui o le Malo se finagalo o le Palemia ua faailoa ai, e lē tatau i se tasi o umia lea tofi o le Malo ona tetee i fuafuaga fai mo le manuia o tagata o le nuu.
Ua faailoa e le ta’ita’i o le Malo i le fonotaga muamua o le tausaga ma i latou o umia ia tofiga, e lē faigata i le Kapeneta ona fai le iuga o le sui o le Malo e lē faia ona tiute aemaise pe afai o loo tausolomua i le faavevesi o mafaufau o tagata o le nuu.
O le tofi o le afioaga o Nofoalii ua faamuta lona taimi galue.
O le mafuaaga ua lagolago i le mau o loo faagasolo i nuu ma alalafaga o loo faatino e le faalapotopotoga o le SSIG, o loo faamalamalama ai le mau a le faalapotopotoga i le tulafono ua lesitala ai fanua faaleaganuu.
O le fono a le afioaga i le vaiaso ua mavae e pei ona faailoa mai e se molimau faatuatuaina, na soalaupule ai le mataupu.
O le taualuga o le soalaupulega, e finagalo le nuu e tumau pea le tofi i le tamalii ua faamuta e le Kapeneta lona taimi galue.
O le fono muamua a sui o le Malo o lenei tausaga sa molimauina e toatele i le au matutua ua onosefulu ma faasolo i le 70 tausaga o le soifua o loo seei i ia tofi.
O le isi lea itu ua silasila le Malo ua tatau ona filifili ni tofi e talavou le soifua, e faamaoni ma toaga e faatino tiute fai, ma vae mo’emo’e i taimi uma.
Na faaalia e se ofisa sinia o le matagaluega o loo iai le vaaia o galuega a sui o le Malo, e lē fou le faamuta o ni tofi o se nuu ona e mafua o mea ua tutupu aemaise o le lē faia o tiute.
O tausaga ua mavae sa totogi masina tofi o nuu ma afioaga, ae o le taimi nei ua ta’i lua vaiaso ma maua lea faamanuiaga.
O le siitaga o totogi ua amata faagasolo mo tagata faigaluega uma a le Malo e lē o lavea ai Sui o le Malo.
E lē o iloa le mafuaaga ma e lei afea i se finagalo faamalamalama o le Minisita o Tupe ina ua faataatia i le Palemene i le amataga o le tausaga, le tala faaopoopo o le Tupe mo le tausaga faaletupe o loo faagasolo nei, lea ua pasia.
