Taimi o le faigalotu sa faaulufale aloaia ai le Susuga i le Faafeagaiga ma le Faletua ma o la alo i le latou Ekalesia fou

Taimi o le faigalotu sa faaulufale aloaia ai le Susuga i le Faafeagaiga ma le Faletua ma o la alo i le latou Ekalesia fou

O le valaauina o le susuga i le faafeagaiga ia Pastor Urika Semuā ma lona faletua ia Motugaafa Semuā e avea ma faifeau o le ekalesia Peace Chapel i Niu Sila nei, e lei faigofie ona talia e laua le valaauina pe a vaavaai i le itu i le tino, auā sa faafaigata ona tuua mafutaga mafanafana ma aiga ma le ekalesia i Samoa, o galuega lelei sa galulue ai, aemaise ai o aiga ua mautu i Samoa. Peitai ane i le itu faaleagaga sa faafaigofie ai le taliaina o le valaau ona o le vaavaai i le Atua ma lona valaauina o le tagata i lana galuega, ma e leai foi se tasi e tu ma tetee atu i le taimi e valaau mai ai le Atua.

Ua sefulu tasi tausaga talu ona galulue le susuga i le faafeagaiga ma lona faletua i totonu o le ekalesia Peace Chapel i Samoa i lalo o le ta’ita’iga a le susuga i le faafeagaiga ia Pastor Samoa Unoi ma le faletua ia Alesi Unoi. Sa faigaluega i le ofisa o le Polenisia i le tele o tausaga faasolo ane ai i le Samoa Tel seia oo lava ina galue i le Blue Sky ina ua suia le Samoa Tel i le Blue Sky i lena vaitaimi, sa faigaluega i le ofisa o le fono ma faamavae ai loa i na galuega uma, ina ua ia filifili e galue i le ofisa o le lotu seia oo lava ina filifilia e le ekalesia aoao e faifeau i le Peace Chapel i Henderson. O lona faletua ia Motugaafa Semuā sa galue i le ofisa o le NPF, sosoo ai ma le ofisa o le Colonial Insurance, ona toe faigaluega lea i le kamupani a le malo o le Life Insurance seia oo lava ina malaga mai e faataunuu lo laua valaauina i le galuega a le Atua.

I totonu o le ekalesia sa tautua le Atua i le tofi tiakono, ma faasolo ane ai i le avea ma toeaina o le ekalesia, ae ina ua tusi lima le ekalesia e tofia e faifeau i Niu Sila nei ma o lea sa faauu ai loa le laua tofi faifeau auā le tausiaina o le tovine.

O le osiina o le feagaiga a le ekalesia Peace Chapel i Henderson ma le susuga i le faifeau ma lona faletua faapea le nofoaalo na faataunuuina i le Aso Faraile ua mavae 8 o Fepuari i le latou nofoaga 98 Bethells Road i Waitakere. Na tumutumu lea nofoaga i le paia o aiga na lua, o sui o le ekalesia Peace Chapel na malaga mai i Samoa e molimauina le faamoemoe, o susuga i faafeagaiga ma o latou faletua, o le afioga i le Minisita lagolago ia Lealailepule Rimoni, o le afioga i le Minisita ia Tialavea Fea Leniu Tionisio Hunt faapea ma le afioga i le Konesula o Samoa ia Faolotoi Reupena Pogi, faatasi ai ma uo ma ē masani sa latou patipatia ma molimauina le galuega fou a le susuga i le faafeagaiga ia Urika Semuā ma lona faletua.

O le susuga i le faafeagaiga ia Pastor Samoa Unoi na ta’ita’iina le sauniga ae o le susuga i le faafeagaiga ia Iliafi Esera na mānavaina le upu faauuina a le Atua e tapena ai lana auauna ma lona faletua i le tausiaina o le lafu mamoe a le Atua. E lima ni upu sa faamamafaina pe sa fai ma taiala i le saunoaga a le failauga e faapea, ia faamoemoe le galuega i le Atua, ia loto maualalo, ia loto alofa, ia usiusitai i le Atua, ma fai le amiotonu a le Atua. O upu ua matimati ai le amataga o le galuega auā ua siitia e le Atua le isi tulaga ua mafai ona galulue ai lana fanau.

Na mae’a le sauniga ona alo atu loa lea i le taumafataga, ma oo atu ai loa i polokalame mulimuli o le aso lea sa fai ai le tofa ia Semuā Fatu Faamalele ma sui o aiga na lua e tu tootoo e momoli le faafetai i le paia o le auvalaaulia aemaise o le saofaiga a susuga i faafeagaiga ma o latou faletua faapea sui o le malo o Samoa sa auai lea sa maualuga ma matagofie ai le faamoemoe ma faaiu ai loa i faaaloaloga masani e pei ona masani ai. O le susuga ia Samoa Unoi o le sui lea o le ekalesia sa tali faitau i le tootoo o le aso.

O le galuega Peace Chapel i Henderson ua atoa nei le tausaga talu ona faatali se faifeau, ona ua siitia i Samoa le susuga i le faafeagaiga ia Isaia Lameta e galue o le pule aoga i le aoga Tusi Paia a le ekalesia ae o lona faletua ia Lisa Lameta ua pule aoga nei i le aoga tulagalua a le ekalesia i Samoa. O le susuga i le a’oa’o ia Ueta sa vaaia le ekalesia e talitali ai le faifeau.

E lima matafale o le ekalesia, ae pei ona saunoa le susuga i le faafeagaiga ia Urika Semuā o le uiga tonu lea o le malaga mai i Niu Sila e o mai e fai le galuega a le Atua. E lē o le fuainumera ae o le valaauina a le Atua o le vaega pito sili lea ona tāua.

O le mea fou i le susuga i le faafeagaiga ma lona faletua i le galuega faafaifeau, o lea ua iai le galuega e tuu ai lona taimi atoa i le vaaiga o tagata ma fai filifiliga ma faaiuga i le ekalesia.

Auā o le mea sa iai sa galue lava i Alafua ae sa iai le isi faamalumaluga i luga atu sa faalagolago iai pe afai e iai ni mea e fai ma to’a i taimi o faaiuga. Ae o le taimi la lenei o lea ua tuu mai ia i laua faaiuga e fai a le ekalesia auā le agai i luma o le galuega a le Atua. O Pastor Urika Semuā e mai le afioga o Lepa ma Vaitele ae o lona faletua ia Motugaafa e mai le alalafaga o Alafua ma Vaitele.