Talalelei Pauga

Talalelei Pauga

Ua maua le isi ma ua taofia i Samoa King Faipopo e lē iloa le aso e toe foi ai i Ausetalia i lona toalua ma lana fanau, ae se’i vagana ai le alii o Talalelei Pauga lea na ia togiina le ulupuaa, o aano o manufasi, o feau tusitusia ma fuamoa agai i le Palemia, a’o saunoa i le tatalaina o le alavaa a le Samoa Airways i Brisbane i le tausaga na tea nei.

Peitai o loo faia suesuega a leoleo, faasaga i lea alii. E iai tuua’iga ua faaoo ane i leoleo faasaga ia Pauga peitai e lē o mafai ona faamaonia ma o loo faia pea iai suesuega a leoleo. Fai mai le paaga a le tusitala, o loo faia suesuega a leoleo faasaga i lea alii. E lei faamaonia foi e le faauluuluga o le vaega o le Ofisa o Femalagaa’iga a Samoa, Valavala Siaopo Pese, tuua’iga e faapea na pepelo le alii o Pauga i le faatumuina o lana pepa malaga ina ua to’ai taunuu mai i Samoa.

“Leai se mea faapena, o lea na matou sueina, o la e tali sa’o le alii o Pauga, i fesili i luga o le form na faatumu.” “Ua matou faamaonia foi e leai ni moliaga faasaga i lea alii.” Ua savali nei i le 3 vaiaso talu ona tuvae mai i Samoa, Pauga, o loo talanoa lava ia i lona saolotoga.”

Saunoa lea alii o Pauga, e pau lava le mea la e fia manao ia silafia e le atunuu, ua ova le lē mafaufau o le Palemia ma ana faamatalaga e lafo i le atunuu. Fai mai Pauga, o le a matuā tutu faatasi ma King Faipopo poo Malele Paulo e faailoa atu o la lagona i le faigamalo o loo iai. O le talitonuga a Pauga, o le HRPP o se faigamalo piopio, ma o se Palemia ua ova le fia pule ma le lē mafaufau.

“Na ala ona ou togiina i le ulupuaa, ona o le nofo ma lalau o’u tagata Samoa o puaaelo, maile ma isi faamatalaga lē mafaufau, ua fetaui ai lo’u toe togi iai o le ulupuaa.” “E pau a lea o le auala e ano mai ai le Palemia, ma ia iloa ai, le tulaga lē mafaufau lea na te faia soo ina, o le togi iai o le ulupuaa.” Ina ua fesiligia pe na taumafai e faafesootai le Palemia, ae fai mai Pauga, e leai, ma e na te lē iloa le mea e maua ai le Palemia. Fai mai lea alii o le a taumafai i se avanoa e feiloai ai ma Tuilaepa, e fia fetaui lava i le Palemia ae lei toe malaga i Ausetalia. Ae o le faaiuga o le vaiaso ae alia’e ane, le isi video ua pu’e e se tasi o alii, e suafa ia Saute Sapolu, o loo ia faaaogāina ai ni faaupuga masoā, faasaga i le Palemia, atoa ai ma isi faamatalaga tau faamata’u.

O le video a lea alii o loo faaperetania, ma o loo ia faapea, “Prime Minister go eat s..t, and will come and shoot you..” O se faamatalaga ua toatele nisi ua faaalia ai o latou finagalo lē fiafia i lē e ana le ata, ae o nisi o loo latou lagolagoina le faasalalauga a lea alii.

O se taumafaiga foi, ua atagia ai nisi o manatu faapea, ua tau fai felelei a’e i luga, taumafaiga a Pauga, King Faipopo lea ua faaopoopo iai ma Saute Sapolu. Peitai na faaalia manino e Pauga, o ia e matuā leai ma sona salamō i lana mea lea na fai ia Tuilaepa. Ua lava lena e ta’u atu ai i le Palemia lona lē fiafia a te ia. “E fai a’u ma sui o le atunuu, o isi e lē o mafai ona faaleo, ou te faaleoina lo latou lē fiafia tele i saunoaga faamaualuga a le Palemia.” “Ua tatau ona iai nisi e latou te faaleoina o latou manatu lē fiafia.” “Mo a’u ou te faia soo se mea mo o’u tagata, ou te oti mo o’u tagata.” Ae fai mai le isi toeaina, atonu ua oo foi Samoa, i le vaitau o tagata faapea.