O avanoa faigaluega mo nisi o le atunuu ma se tupe maua mo le Ofisa o Faigafaiva, o nisi ia o faamanuiaga ua silasila i ai le Minisita o Faatoaga ma Faigafaiva o Samoa, ua laga ai nei se feutagaiga ma se kamupani faigafaiva mai i Taiwan ua folasia mai sona manaoga e faalautele ana galuega mai i Samoa.
O le kamupani ua faaigoaina o le Yah Yow Ltd, ua savali nei i le lima masina o vaaia le taula o ona vaa i le uafu i Matautu ae ao ai le i‘a o loo maua e ona vaa fagota ia e fagotaina nisi o ogasami o le Pasefika o loo maua lo latou faatagaga, ma ua totogi a latou tupe e fagotaina.
Ua tele tausaga o taula o latou vaa ma faatautaia mai a latou galuega i Fiti, peitai o le tausaga na tea nei na amata ai loa ona agai mai i Samoa nei.
E na o le taula lava la i le uafu o Apia ma faatalitali ona vaa fagota e agai mai i Samoa nei ma utu vaa tetele nei i o latou faiva, ona o ese foi lea seia oo i le taimi e toe faatino ai lea galuega.
Ua faaono nei ona agai mai i Samoa ma o le latou faamatalaga e pei ona fesootai ai ma le Minisita o Faatoaga ma Faigafaiva i Samoa nei, le Afioga Le Mamea Ropati, e lelei le tulaga o Samoa ona e ogatotonu i le tele o ogasami o loo o latou fagotaina ma ua faigofie ona faatino ai le galuega e pei ona faatautaia nei mo ia masina ua tuanai. O lea la ua iai le manaoga o lea kamupani ina ia faaopoopo atu lo latou taimi i Samoa ma ua talosagaina le Matagaluega o Faatoaga ma Faigafaiva, i se fale e faamautu i ai le teuina o ana i‘a ma o se nofoaga o le a faapea ona teu ai le i‘a lea o loo ao mai ma faatau atu loa i fafo.
O Taiwan lava o loo tele ina agai i ai le i‘a o loo ao e le Yah Yow peitai o loo iai isi maketi i fafo o loo agai foi i ai ma o le mafuaaga lea o le vaavaai ia Samoa e faatu ai loa se nofoaga e tapena uma atu ai le i‘a e faatau atu.
O le isi nofoaga o loo talosagaina e lenei kamupani mai i le Malo o Samoa o se nofoaga e faamautu ai meafaigaluega mo vaa fagota ia e ta‘ape i ogasami o le Pasefika. Faaalia e le Afioga i le Minisita, o le a maua galuega a nisi o lo tatou atunuu ona o lea atina‘e ua fia faalautele i Samoa nei ma o le a faapea foi ona iai se isi faaopoopoga o tupe e totogi mai e lea kamupani i Samoa. O le taimi lenei o loo totogi le taula ai i Samoa ma o Pulega o Uafu ma Taulaga e agai i ai lea tupe.
O le tupe faaopoopo o le a maua e Samoa i ia taumafaiga o le a maua mai i le i‘a lea o le a faatau atu pe a mae‘a ona tapena i Samoa nei.
O le a maua e Samoa le $1 i le kilo o soo se i‘a lava o le a teu i Samoa ma tapena atu mo atunuu i fafo ma o le tupe lea na ta‘ua e Le Mamea o le a alu sa‘o lava i le ofisa o le Faigafaiva a Samoa.
