Taitaifono ma le mamalu o le pulega a le Samoa Airways ma nisi o le atunuu i Sini

O le afiafi o le Aso Faraile 26 Iulai 2019, na faamalo’ulo’u atu ai ta’ita’i o le atunuu i Sini Ausetalia, e tali atu i le valaau faaaloalo mai le pulega ale Kamupani Vaalele a le Samoa Airways, lea sa taitaiina mai e le afioga ia Tuia Pua Letoa ma le Ofisa Sili o le Kamupani Vaalele. 

O le iai la o le faigamalaga i Sini, o le toe fia faamalamalamaina lea o vaega uma o loo moomia ai pea le lagolago a tagata o le atunuu, e ala i le auaunaga a le Samoa Airways. 

Na molimauina foi le tele ma le anoanoai o finagalo o le mamalu sa auai, lea lava foi sa tali lava i ai le Taitaifono o le Fono Faatonu, le afioga ia Tuia Pua Letoa aemaise foi o le afioga i le Ofisa Sili o le Samoa Airways. O lenei feiloaiga sa faatinoina lea i le ofisa o le Konesula Aoao o Samoa i Sini. 

Ina ua mae’a le sauniga lotu puupuu sa taitaia e le susuga i le Taitai o le AOG, le susuga ia Pastor Titi Taulapapa, ona saunoa faafeiloai loa lea o le alii Konesula ia Auseugaefa Vaasatia Tuvaifale Poloma Komiti ma ia faalauiloaina o nisi o auaunaga eseese a le Malo Samoa, o loo faamautuina ai nei i totonu o lo latou Ofisa Tutotonu i Liverpool.

Ona tuuina atu ai loa lea o le avanoa i le pulega a le Samoa Airways ma la latou mataupu faalauiloa. O le taitai mai e le afioga ia Tuia Pua Letoa o lenei faigamalaga faalauiloa, ona o lona tulaga Taitaifono o le Kamupani Vaalele e pei ona tofia nei i ai, talu ai le faamavae ai o le susuga ia Feesago Siaosi Fepuleai, sa ia umia mai lea tofiga, ina ua faatoa faavaeina le Kamupani Vaalele a le Samoa Airways. 

Sa auai ai foi i lea feiloaiga nisi o faifeau mai ekalesia e pei o le AOG, EFKS, Metotisi Samoa ma le Katoliko. E na’o le toalua sui o le Media sa valaauina ai, o le 2FS-RADIO Le Foafoa Samoa o le sui foi lea o le Samoa Times, ma le susuga ia Tiumalu Maifea o le Toe Faaolaola.

Sa auai foi nisi o kamupani tau femalagaa’iga e pei o le World Travel ma isi i lea po. Sa faatasi ai foi i lea po le tamaitai pule o le Samoa Airways i Ausetalia, le afioga ia Fuimaono Lydwina Ni’o. O le susuga ia Tiumalu na fai ma sui o le valaaulia, e saunoa i se upu e faafetaia ai le Kamupani Vaalele ona o le avanoa ua maua e faasoa ma faamanino ai la latou pitolaau.