O nisi o alii faiaoga mai Saina sa tapenaina autaaalo a Samoa mo taaloga a le Pasefika

E maoa’e le taumafaiga a tama ma teine aooga i Kolisi maualuluga a le atunuu ia latou faaiuga o latou taumafaiga i taaloga na auai ai i taaloga na se’i mavae atu nei. E lē o se vaega faapea ua sopolia i le silasila a le atunuu.

E tusa ma le fa masina lea na kolegi ai tama ma teine i Saina ma e silia ma le 300 le aofai o tama ma teine taalo na malaga. 

Na faaalia e se tasi o alii faiaoga a Saina na gafa tonu lava ma afeleti, Tie Zhing, o le usitai ia o tama ma teine Samoa sa i lalo o le latou vaaiga.

“O le autaalo a Samoa ia na avatu mo koleniga, e ese le talenia, o loo iai le taleni, peitai e lē o mafai ona faaaogā. O ni tagata  usiusutai, toe toaaga, e lē o ni tagata faalogologo tiga, o ni tagata e tausi i toleniga ma faamaoni, e feala tonu lava i le taimi e amata ai toleniga.”

O le faaiuga o le vaiaso na toe taliu ai faiaoga mai Saina ma le fiafia ina ua tino mai le latou fesoasoani ona o le tele o taaloga sa lē iai se faamoemoe e maua ai pine auro, a’o lea na maua ai pine auro a le atunuu. 

O le mae’a o taaloga o le Pasefika ua fesiligia ai pe tatau ona faaauau pea le fesoasoani a le malo Saina lea na aumai pe leai.

O le finagalo o le taitaimalaga a le ‘au a Samoa, Nynette Sass, atonu e iai le faamoemoe e faaauau pea, peitai, o loo taumate le tulaga lea, ae o lona loto atoa ia faaauau pea lea faamanuaiga, auā e lē na’o taaloga o le Pasefika o loo tauva ai Samoa.

“E iai taaloga e pei o taaloga a malo o le taupulega, le Commonwealth, o loo iai suega siamupini a le lalolagi, e lē gata i lea o le faatumutumuga o taaloga a le lalolagi le Olimapeka, ma e moomia ai pea la le faaauau pea o le sootaga lea mo tatou autaaalo.”

Fai mai Nynette, e ao ona faaauau le sipili lea o tatou tamaiti, ma o loo ia talosagaina le malo, ina ia faamatuu atu le faaaogāina o faletaalo ma malae taalo e faaaogā e le autaaalo e kolegi ai. O se manaoga lea e moomia ona faatino.

“Afai o le tulaga lea o loo agai i ai le malo ina ia atina’e taaloga, e tatau ona faaavanoa fale ma malae taalo e faaaogā, tuu ia le tulaga tau tupe, auā ou te talitonu e mafai lava e le autaalo ona agai e sue latou tupe e faatino ai a latou manaoga tau tupe

Ta’ua foi e Nynette e iai lona manatu maualuga ina ia faatuina se polokalame faapitoa, e pei o se Academy e agai i ai a tatou tamaiti e kolegi ma aooga ai. “O loo fuafuaina lea faiga lelei, ma o se tulaga lelei mo tatou i le agai i luma.”

O le amataga o le vaiaso na faaalia manino ai e le taitai o le atunuu, o le fesoasoani a Saina lea na ave ai le autaalo i Saina e koleni ai, o se auala na fai ina ua talosaga sa latou fesoasoani mo taaloga o le Pasefika.

“O lona faaauauina ma lona lē faaauauina e lē o iloa, auā o mea na fai ma talosaga ona o Taaloga o le Pasefika, pau le tulaga tāua o le a se’i vaavaai le malo i le aumai o ni faiaoga faapitoa i taaloga, e koleniina tatou tama ma teine taaalo.”

O le faaiuga o le vaiaso lea na faia ai se fiafia a le amapasa Saina mo tama ma teine taaalo na malaga i Saina e koleni ai.

Na saunoa ai  le faiaoga o le peresetene foi o le aufanafana fulu‘aū, Muaausa Joseph Walter, i le tāua o le fesootaiga lea na fai ma le malo Saina, o lona manatu pe ana fai la e sili atu masina ia na koleni ai le ‘au a Samoa nai lo masina e fa, e maualuga lona talitonuga e sili atu le numera o pine e maua e Samoa.

E lē o mautinoa i le taimi nei, pe maua ni faamanuiaga mo i latou na maua pine auro, ae na saunoa le Palemia, ua mae’a ona faataoto faiga masani a le malo mo lea faamoemoe.