Ua fetaui tonu lava le pa’ū mai o timuga ma le galuega fesoasoani sa faatautaia e le Tavau fofo i Lotofaga. O le Aso toonai na tea nei sa masii atu ai le aufaigaluega a le Tavau fofo i Motootua ma ana paaga, e faaleleia le maota o le tina ia Lei ma lona alo.
O Lei ua 70 tausaga o lona soifua, ua lē mafai ona savali, e faaaogā le nofoa tulei e fealuai ai. O lona maota taalaelae ato apa faatafafa o loo nofo ai, e leai ni puipui ae faapola tapoleni, ma nai fala saina e ufi ai le sima, o lana ogaumu kalasini matalua, o le laulau e tuu uma i ai mea pe a pisi, o ana meafale na, ma si ana tanevai e faasisina i ai le ‘afa o apa o le pito i tua o le ato soosoo o lona fale.
Peitai e pa’ū lava timuga i le Aso Toonai na tea nei, ae ua pa’ō foi le galuega fesoasoani a le Tavau fofo, o isi e faapipii le faaalo fou, ae a isi i le kapeta, ma le faamamāina o totonu o le fale ia malu mai le pisi ma le palapala mai timuga.
Na maitauina o le tasi faaletonu o loo manaomia e le tina ia Lei, o se faletaele mo ia. Lea foi ua tapena i ai le Tavau fofo, e fesoasoani i le isi lena manaoga tāua o aso uma.
Na talanoa ai Lei, “e lē mafai ona ou alu i le faletaele i fafo ane o le maota o le matou aiga, aemaise o le po. E toia lava le fala ae o si ana tama lava e nafa ma le faamamāina.
E pa’ō le galuega i le Aso Toonai, o loo faia foi galuega faamamā a lona aiga i autafa lava. O loo iai le maota palagi e fai lona faasee i tua, e puipui ma faamalama, o iina e alala ai le tuagane o Lei ma ona alo ae tele lava ina tuufua. “O lo’u tuagane lea o loo matai i le matou aiga e nofo i le maota lena.”
Na ta’ua e alo o le matai, o latou e nonofo i Apia, ae o loo fai foi le latou galuega faamamā i lo latou fale.
Ma molimauina ai ua lē gata ai ina pa’ō le moavao i autafa o le maota o le matai, ae o le pa’ō o samala a le Tavau fofo, i le tutu’iina o pepa faaalo i luga.
Ua taatia foi le uta laupapa mo le faiga o laau faalava e tutu’i i ai le faaalo. Na talanoa le tamaitai na gafa ma le tapenaina o lenei faamoemoe, o le faatupeina o le galuega atoa lenei, o tupe maua a le Tavau fofo.
O le Tavau fofo o le tamai falemai e fofo ai tino o gasegase, o ma’i eseese o aso nei, e fesagai ma le falemai tele i Motootua. E totogi ai si tupe ae faatino le galuega e tamaitai ma alii ua iai agavaa faapitoa.
O gasegase o tino gagase, ulu tiga, gugu, manava, maso, ma ua molimauina e le Tusitala, le toatele o gasegase ua toe savali ma malolosi, i togafitiga mai le Tavau fofo Clinic. O se vaega o le aufaigaluega i le Aso Toonai, i Lotofaga, e lolotu i le Ekalesia Aso Fitu Misiona. Le vaega lea e fai i Aso Sa a latou sauniga. Ma ua maitauina o le tasi foi lenei o tapuaiga ua masani ai lava o latou tagata i le faia o galuega fesoasoani faapea.
Na talanoa ai le tina ia Lei, na amata mai le la mafutaga ma le alii pule o le Tavau fofo, ina ua faalogo i lana polokalame i luga o le Talofa FM, ma ia vili lea i ai, e fesoasoani ane ia te ia. E lei pine lava lea aso, ae taunuu atu le alii Taulasea.
O loo taofia e le tusitala le suafa o le Taulasea, ona e matamuli e ta’u lona suafa. Talu ai e lē o faia lenei galuega fesoasoani mo se viiga o se isi, ae mo le viiga o le Atua.
O le faafetai sili lena a le tina ia Lei, ona o le alofa o le Atua, ua faasino atu ai lenei Samalia agalelei. “Ua uma ona folafola mai e le alii mea lelei e tele o le a ia faia mo a’u, e faaleleia ai le mea o loo o’u nofo ai.”
Na musumusu mai le tasi o le aufaigaluega, o lea aso, o le faletaele o Lei le isi lea laasaga o le a oo atu iai i se taimi lava e faataga mo lena faamoemoe. O le aukamuta e iai foi o latou tuatuagia i galuega masani ai i le vaiaso, ae ua faaavanoa le Aso Toonai, e tulituli ai le galuega fesoasoani lenei.
O le masina fou o Aokuso le aso fanau 71 o le tina ia Lei, e oo atu i ai ua taatia mai lona maota, i se ata matagofie ma faafaigofie ai ana fuafuaga o aso uma. O le walker fai uili e iai ma le nofoa e mapu i ai, na faameaalofa atu foi e le isi tagata ia Lei.
O lona moomooga ia maua e tagata uma le filemu ma le fealofani. Talu ai ua lē mafai ona ia toe faia ni galuega sa masani ai a’o talavou, o lana tatalo, “ia maua pea e nei Samaria agalelei le alofa ma famanuiaga mai le Atua.”
