ALA MAI: o le uluai polokalame i lalo o le faamalu o le Collateral Culture

Juliana Sopoaga – Managing Director, Alaniyah Leota-Afoa ma Albert Fale – se tasi o Head Tutors o le Ala Mai

O le “ALA MAI FiaFia Night” o se polokalame na faatinoina ai le tele o ni lesona na ausia ma aoaoina mai i totonu o le 2 vaiaso na faagasolo mai ai. E faapitoa lea i le a’oa’oina o nisi vaega i le gagana Samoa e pei o pese ma siva Samoa ae faapitoa lava i itu tāua, o le avea ai lea o oe o se teine ma se tama Samoa.

O lea faamoemoe na faataunuuina i le itu i matu o Melepone i Vitoria ae o loo faamautu i le nofoaga autu i Craigieburn. E 72 le aofai o i latou na auai atu i le ALA MAI Holiday Programme, o i latou nei sa faafiafia i le po o le polokalame e amata mai le tausaga i le 6 agai atu i le 20 tausaga le matutua. O nisi o tamaiti a’oga o isi na fananau i Ausetalia, o nisi foi na tutupu a’e i atunuu i fafo ae o le uluai taimi lea ua faatino ai pe auai ma faisao i polokalame faapenei.

O le a’oa’oina o nei tamaiti, e toalua faiaoga o loo faauluulu i ai le a’oga, o le susuga ia Albert Bux Fale (New appointed Head of Cultural Pillar – Collateral Culture) ma Juliana Sopoaga-Lologa (Managing Director ma le Founder o le Collateral Culture) e faiaoga uma laua ma tauaveina vasega uma.

E ui lava la o faiaoga na soifua a’e i Niu Sila ae na iloga foi o latou taimi na auai atu ai i Polyfest a’o iai i aoga maululuga i na vaitaimi, faasolo atu ina faiaoga i kulupu Samoa mo le ASB Polyfest i le tele o tausaga ua mavae. Ua tele tausaga i le poto masani i Polyfest ma le aoaoina o aufaipese, ausiva, autalavou ma isi taleni a’o feagai ma faiaoga.

E lē gata i lea, o le faamoemoe a le ALA MAI, na iai faiaoga lagolago e aofia ai Jenny Lologa, Satu Johnson ma Taniu. E toafa taitai i vasega e aofia ai Mellizzha Papalii, Deveraux Feo, Zacharius Fuimaono, Taele Lologa.

Collateral Culture ‘Ala Mai’

O Juliana, e iai lona alo tama (son) e 6 tausaga le matua, ae o lana fuafuaga e toe fia taliu i Niu Sila se’i toe faatata’i le mafaufau o si ana tama i le amataga ma le foafoaga o lona iloa ma le silafia na ia aoaoaina mai ai le aganuu a Samoa aemaise o le tele o mea na ia aoaoina mai le aganuu, peitai o se miti na fuafuaina e le Atua e mafai ona ia faaauauina lenei naunautaiga i Ausetalia nei, lea ua tauau ina tino mai.

Na tuu atoatoa i ai le taimi i le 5 vaiaso na fuafuaina mai le polokalame a le Ala Mai, ma o se lagona faagaeetia i le tulaga na molimauina le sologa lelei ma le manuia. Ana lē seanoa le uulima ma galulue faatasi o tagata uma, e lē mafai ona tino mai le faamoemoe lenei, ua lē uma ai le agaga fiafia, ae ua faaosofia lagona i le olioli.

Ta’ua e Juliana, o lona galue ai ma faia ni galuega e fesoasoani i tupulaga talavou, ma fanau, o lana ia lea matafaioi ma lona faanaunauga ia faavaeina lenei polokalame o le ALA MAI ina ia avea o se toe fafagu, ma ea i luga tupulaga se’i toe fafau ma faatupu se isi moemoe fou.

O le uluai polokalame lea ma le amataga o se tasi vaega o le Collateral Cultural 4 Pillars. O loo ua faavaeina le core team o le auvaega faapitoa lea o le a tauaveina le igoa o le ALA MAI e latou te faailoa atu le uiga tonu o le polokalame i fafo atu aemaise o meafai a le atunuu.

O le aotelega ma le faanaunauga, e lē toe mamao ae tino mai se amataga fou e mafai ai ona faailoa atili i totonu Melepone Ausetalia ma le lalolagi le tāua tele o nisi nei o vaega o le aganuu a Samoa, e mautinoa ai le solo lelei o le tautala a tamaiti i le gagana Samoa e pei lava ona amataina mai ai i Niu Sila ma Samoa soifuaga o faiaoga. O nei mea uma, e foi ai lava le viiga o le Atua ae tumau le faatauvaa o le tagata.