Ua loa tausaga e lē o fevaaia‘i ma maua ni feiloaiga vavalalata ma nai ona uso ma tuagane ma fanau ona o le vavamamao o nofoaga o loo nopia‘i ai, ae ua faia e le Atua lenei laolao e toe feiloai fiafia ai ma nisi o ona aiga ma uo, ona o se aso sa faapitoa mo ia, le faletua ia Imeleta Telesia Atuni Chan Tung Leofa, e pei ona sa faamanatuina ai le atoaga o lona iupeli auro, lona 50 tausaga i le Aso Toonai, 14 o Mati 2015.
O lenei fiafia sa faia lava i le maota o le faletua ia Imeleta Telesia poo Sia ua lausilafia ai, ma si ona alii le susuga ia Joe Leofa. O i laua e mai alalafaga o Letogo, Fagaloa, Leauvaa ma Fugalei, ma o se ulugalii ua iloga foi i le tulaga tau pisinisi e pei ona silafia ai e le toatele.
Ua lausilafia le susuga Joe ma lona faletua ia Sia, e le mamalu o Samoa i Brisbane i le la tautua i le fofoga taumafa o le atunuu, le Sia’s Takeaway, ma ua iloga foi ona alumia le tele o taumafa a le Sia’s Takeaway aemaise lana keke mamoe ua fai ma ma‘oi o le toatele.
O inā foi le isi nofoaga o loo faatauina ai ma le nusipepa faavaomalo, le Samoa Times.
O se po matagofie auā sa potopoto uma aiga uo ma ē masani ae o se fiafiaga i le tamaitai o Sia ona e ui ina sa lei mafai ona auai uma mai nai ona uso ma tuagane, ae sa mafai lava ona pa‘au mai isi vaega o nai ona uso e aofia ai i latou na malaga mamao mai Samoa, Amerika, Niu Sila ma isi itu lava o Ausetalia nei.
Sa valaaulia ma molimauina lenei faatasiga tāua, e nisi o uo ma paaga a le Sia’s Takeaway, ae lē gata i lea o aiga pele ma fanau, faapea le Convenor o le leitio 4eb le afioga ia Lemalu Timu Peni Fenunuti & faletua ia Senerita Fenunuti, Faasuamaleaui Siaosi Tupuola, le Peresetene o le Aiga Samoa i Matu le afioga ia Taulapapa Lemalu Roy Slade & faletua ia Joyita Slade, aemaise nisi o le aufaipisinisi i la latou galuega fai faatasi e aofia ai Elisapeta ma Robbin, le tofa ia Poulava Sam ma Lona Matautia o le Uncle Sam’s Takeaway, faapea nai aiga na malaga mai Samoa ma Niu Sila sa latou molimoli mai ni meaalofa anagata ma le matagofie mo le faletua auā le faamanatuina o lona aso soifua i lea afiafi.
Na fiafia tagata uma i taumafa sasala ma le manogi sa tapenaina lava e le Sia’s Takeaway.
Ia manuia tele le faamanatuina o lou 50 tausaga Imeleta Telesia Atuni Chan Tung Leofa! Alofaaga ma faamanuiaga mai ou aiga uma, uo ma paaga faapea le tamā o le aiga, susuga ia Joe ma le nofoaalo, ae sili alofaaga auina atu i le leitio a le Penina o Asuisui. Faafetai tele i le lua agalelei ma le lagolago malosi mai i masina uma i lenei alaleo.
Faamanuia le Atua!
