O le amataga o le tausaga ina ua toe amata lenei tausaga faaleaoaoga na aliali mai ai se gaioiga na fasi ai se tama aoga o le Kolisi o Sagato Iosefo e ni tama aoga lava o le kolisi. Na pue e se isi tama aoga i lana telefoni, mulimuli ane i le vaiaso ua mavae, na silasila le lalolagi i fesootaiga televavave i le ata poo le video o lea gaioiga.
E tolu aso talu ona aliali mai lea video ma silasila i ai tagata, ae liliu loa le Faatonu o aoga a le ekalesia Katoliko le afioga Aeau Chris Hazelman ma valaau se feiloaiga ma tusitala lea na faia i le Aso Faraile na tea nei, ma faailoa ai lona faanoanoa tele i le gaioiga ua aliali mai i fafo.
O le saunoaga a le faatonu ua iai molimau e faapea na silafia e nisi o faiaoga o le kolisi le faaoolima na faia, ae sa latou lē faailoaina i le pule o le kolisi.
“O lea ua faia suesuega ma a maua e lē toe iai se avanoa o faiaoga ia e toe galulue ai i le kolisi”. “O lea foi la o loo maua le avanoa e faailoa atu ai e faiaoga na silafia le mea na tupu i latou, auā a maua i le suesuega o le a matuā mamafa loa se faaiuga e faia i ai”.
E toalima tama o le kolisi o loo iloa foliga i le video ua faia i ai le iuga e tutuli ma faamalolo e lē toe maua se avanoa e aooga ai i Sagato Iosefo.
Ua iai foi le faaiuga e tuuina atu i aao o leoleo le mataupu mo le faia i ai o se suesuega ma faia ni moliaga faasaga i tama aoga na aafia i le faia o le faaoolima.
Na faaalia e le faatonu o aoga a le Katoliko, e matuā lē toe iai se avanoa o ni gaioiga faapenei e aafia ai soo se tama ma se teine o aoaoina i aoga a le ekalesia, ma o lona talitonuga o le faaiuga foi lea mo fanau o loo aoaoina i isi aoga pe afai e maua o aafia i ni amioga faapea.
Ina ua aliali mai le ata video o le faaoolima i fesootaiga televavave faaonapo nei le facebook, na molimauina le toatele o tagata na faaalia o latou lagona inoino ma le lē fiafia i le gaioiga na faia i le tama aoga o lea kolisi, lea e faapea o loo i le vasega Tausaga 11.
E iai foi le talitonuga o le tulaga vave foi lea na iloa ai le mea na tupu lea o loo iai le talitonuga o le amataga o le kuata muamua lenei o le tausaga, ma na tupu e lei filifilia taitai poo prefects o le kolisi.
O se tasi lenei o mataupu ua toe aafia ai le igoa o le Kolisi a Sagato Iosefo, i le tuanai o ni tausaga sa pisipisia ai le igoa lelei o lenei kolisi a le ekalesia Katoliko ona o amioga a nisi o fanau sa aoaoina ai, lea na mafua ai nisi o vesiga ma nisi o fanau sa aoooga i nisi o kolisi i le taulaga.
