Ua leva ona tulimatai Ekalesia i Ausetalia e feiloai ma feofoofotai le alofa faa-Kerisiano i lana Fonotaga faaletausaga lea sa usuia mai laufanua lanuava ma le mafanafana o le Setete nei. E ui lava i ala o le tagata ae ana lē seanoa Ieova semanu e lē tau lau o le faamoemoe.
Na usuia ma tatalaina i le Aso Faraile 13 o Mati, faagasolo mai le Aso Toonai ae faamae‘aina i le Aso Sa, 15 o Mati.
O le susuga ia Ps Peteru Poloai o le failautusi lea a Kuiniselani, sa feagai ma le tapenaga o fale apitaga ma vaega uma ina ia mautinoa ia maua le fiafia e le au usufono ma susuga i faafeagaiga e lē gata i lea ia tausi lelei lo latou soifua maloloina i taumafa faaletino ae sili i le faaleagaga.
Na toatele i latou sa naunau e malaga mai ai ona o le setete talimalo ma laufofoga fiafia ona tagata. O le taitai lava poo le faaao a le ekalesia i Ausetalia sa avea ma taitai. Na soalaupuleina le tele o mataupu auā le lelei ma le alualu i luma o le galuega a le Atua i ona vaega uma.
I lea lava fonotaga na tauaao aloaia ai Tusipasi Faafaifeau o nisi o faafeagaiga e pei o Ps Sini Tauti; Ps Iose L. Iusitini; Ps Moanatuli Galuvao ma Ps Tuigamala Luamanu, o nisi o faifeau o loo tausi ekalesia ma nai o latou faletua.
Taitai aoao o le ekalesia a Ausetalia o Ps Taeauga Ropati & Saeseese Frost (Kuiniselani); Sui taitai o Ps Apouani Unasa (Melepone); Failautusi o Ps Tau Loli (Sini); Teutupe o Ps Faitoaga Soloi (Sini).
Na iu manuia le fonotaga ma toe ta‘ape ai le fuamanusina ina ua mae‘a faaaloaloga i le aoauli o le Aso Sa, lea sa feagai ma le tofa ia Tauaimalo Ponesi Faavae Su‘a.
