Fefe i le tautau mai o se tagata i le ‘ulu

Na ou toe tamoe i le matou fale i lo‘u fefe, ina ua ou vaaia se tagata o loo tautau mai i le ‘ulu

Ua tautino se tamaitai talavou e galue i se kamupani i le nofoaga o pisinisi ma falegaosi oloa i Vaitele, i le faateia o lana vaai i se mea uigaese, ina ua usu i lana galuega i le taeao o le Aso Faraile, 13 Aperila. Na faamatala le tamaitai ua musu e faailoa lona suafa ina ua oo ane i le auala savali, e i luma ane o lo latou fale, ae ia vaaia se tagata o tautau ane i lalo o le ‘ulu. “Na ou toe liliu faavave ese ma ee, ma ou tamoe televave i lo matou fale ona ua ou fefe tele”. Na taufetuli ane nisi o le aiga ma fesili poo le a le mea ua tupu, ae sa na o le faataitaio o le tamaitai ona ua le mafai ona ia faamatala lea vaaiga i lona fefe ma le mata‘u ona faatoa taia lea o lana vaai i se mea faapea. Ua faamaonia mai e leoleo o se alii talavou ua fai lona aiga ma si ona atalii na pule i lona ola i le aiga o lona paolo sa nofo ai i Alafua.

E faapea le faamatalaga o se molimau mai se tasi o leoleo, o se mataupu faalotoifale i le va o le ua maliu ma le tuaa o lona toalua na mafua ai ona tupu lea faalavelave. Ua oo mai nisi molimau ua ta‘ua ai o le po o le Aso Tofi a malama le Aso Faraile na tupu ai le faalavelave na oo atu le ua maliu i le aiga e faasuaava.

E faapea na alu atu ma se fagu vailaau fanavao, ma sa ia faailoa ai lava lona faatino o se faalavelave. Peitai na faamatala se molimau o se tasi o le aiga, sa mafai ona fao ese le fagu vailaau ma vili loa leoleo mo se fesoasoani.

Peitai na fiu e tatali i le po lea e lei oo atu se fesoasoani. O se faanoanoaga lea i le aiga ona sa naunau e fia maua se galuega a leoleo i le faafitauli ae peitai sa le maua. Na fesiligia le Sooupu o le matagaluega i se faamatalaga o lea pule i le ola, ae sa faailoa mai e le Sooupu le afioga Leaupepe Fatu Pula, e leai se mataupu faapea na oo atu i lipoti o le vaiaso atu i tua.

“Ou te leiloa la se mea faapena”. Na faailoa i ai e le tusitala o lenei lipoti le mea na tupu, e tusa o sailiiliga i ni faamatalaga e faamaonia ai, ae sa le maua se tala mai le sooupu o le matagaluega o leoleo, ona o lana pitolaau e faamoemoe i lipoti o loo tuuina atu e le vaega suesue le CID ma le general policing poo le GP. O le Aso Toonai, 21 Aperila ua faia ai toe sauniga o le ua maliu i lona aiga i Fasitoouta, ma o se alii sa galue o se ave taavale lau pasese poo se taxi. Ua silia i le 30 tausaga o lona soifua.

More Posts