“Ua faamuamua ia te a‘u lou alofa i la‘u fanau ma lo‘u aiga,..” Brian Lima
E sefulu moliaga sa molia ai Lemalu Sina ma e fesootai moliaga ma ni tuuaiga o ni faiga taufaasese ma faiga faamalosi ma faalatua e mafua i se nonogatupe tau pisinisi sa faia i se faletupe i Niu Sila.
“Ua faamuamua ia te a‘u lou alofa i la‘u fanau ma lo‘u aiga, o le mafuaaga lena ua toe ave ai i tua”.
O le finagalo puupuu lea o Muliagatele Brian Lima, ina ua ulufafo ma le potu faamasino ae faafetaui atu i se fesili a le tusitala.
O se tasi o valaauga o le mataupu i le masina nei lava na aveesea ai moliaga e lua mai le aofaiga e sefulu o moliaga na faia e leoleo.
Na totoe ai le valu lea na talosaga Muliagatele Brian e aumai i tua ma faia ai loa le faaiuga a le faamasinoga e faaleaoga ma soloia moliaga uma.
O Lemalu Sina sa avea ma peresitene o le faalapotopotoga o le aufaipisinisi i Samoa, le Samoa Chamber of Commerce, ma o le avā faaipoipo a le uigi tautaua o le Manu Samoa ua malolo litaea mai le taaloga.
Na molimauina le toatele o aiga o le faletua o Lemalu Sina sa auai i le faamasinoga i le Aso Faraile na tea nei, ma o le laufofoga o le fiafia na molimauina ina ua masuiga malie le mataupu ma ua fofo a alamea.
O le susuga i le faafeagaiga, Laki Slade na fai ma sui o le aiga o le tina o Lemalu Sina e faafetaia le afioga ia Muliagatele Brian Lima ma lona aiga i le mafai ona faatino i se auala filemu le mataupu ina ua toe aumai i tua le tagi ma faaui ai i tua ma moliaga na faia e leoleo.
Sa umi ona faataamilo lenei mataupu i le va o itu na aafia e pei ona molimau se tasi o le aiga ona sa naunau lava e toe fofo le mataupu i se auala filemu. “O le mea sili ona taua ia te a‘u o lea ua mae‘a”, na saunoa ai le na faauluina le tagi i se talanoaga i fafo o le potu faamasino ina ua mae‘a.
