Ua silia ma le 3 masina talu ona mae’a ona sainia le lisi o le faaaogāina o fanua o le afioaga o Tiavea e fausia ai le malaevaalele a le malo, lea ua lata ona mae’a, ae mapuna ane loa i luga se tasi o feseesea’iga a se tasi o aiga o loo aafia o latou fanua i le galuega o loo fai nei.
O le feseesea’iga la, e lē o agai i le malo, ae ua pau tonu lava i le leai o se tasi aemaise o le tuu fesilisili poo ai a sainia le tupe o le lisi o latou fanua lea ua ave e le malo e lisi mo le malaevaalele.
O le tina ia Vasati Valai Tapuni o loo ia faapea mai, e faatoa iloa ane e suli uma o le suafa Valai i Tiavea lava, ua aveese atu o latou fanua mo le lisi a le malo, ae ua mae’a ona faatino le lisi, ma saini uma pepa, mo le faamoemoe.
O Vasati o le auaiga o Valai i Tiavea lava, ma o le fanua tau Valai e 5 eka lea ua faaaogā nei. O se faamatalaga e faailoga fesili ona ua fai si umi o tausaga o faatino polokalame taulogologo a le Matagaluega o Fanua ma Siosiomaga, ma isi Matagaluega a le Malo ma alii ma faipule o le afioaga o Tiavea i le mataupu.
O ia feiloaiga e aofia uma ai alii ma faipule ona momoli lea i ai o le manaoga a le malo, ma o le autasiga la lea ua faatoa faataunuu ai le galuega o le fausia o le malaevaalele i Tiavea. Ae o lea ua faatoa mapuna ane i luga le faaseā a lea tina ua mae’a ona saini le lisi.
O le faagaulemalie o Vasati, ona fai mai ia, e lē o iai se Sa’o o le latou aiga i le taimi nei, se’i vagana ai lona tuagane o Seumanu lea o loo matai i le aiga o lona toalua lea ua fesootai ma faitonu ma alii ma faipule ma le malo ma avatu ai le latou fanua, ae augapiu ma se iloa e suli o le latou aiga.
“O le matou fanua lea ua vevesi ai nei i le taimi nei ua iai le finau malosi a le malo ma le nuu e lē malamalama matou poo ai ua sainia le fanua e lē o logoina matou e tusa ma aiaiga ina ia malilie uma sui, ia ioe faatasi uma e sainia le fanua.”
“O lo’u tuagane lea e nofo i le taimi nei e matai ae lē o se matai o le matou aiga e ese le mea e matai ai ia, e lē aiāina e le suafa matai la e matai ai i le taimi nei, le fanua o le matou aiga, ae peitai ua amanaia e le malo faatasi ai ma le matagaluega lo’u tuagane e aunoa ma le iloa e suli o le matou aiga.”
“E leai se isi o nofo i le suafa Valai. O le mea tonu lea o loo taumafai atu ai se taumafaiga vaivai, e lē o malamalama le taimi na faasavali ai fuafuaga a le malo.
Ae peitai ane o le tuagane lea o a’u lea o loo nofo na’o ia i le fanua lea, ma o ia foi e toatasi na ioe i le taimi na faasavali ai le fuafuaga a le malo faatasi ai ma le auai o le nuu, a’o matou nei o suli o le aiga e lē o iai se malamalamaga ma e lei logoa foi matou i le mataupu lea.”
“E lei logoa foi matou e lo’u tuagane e tusa ai ma le faamoemoe lea, tusa lea sa fai faananā e lo’u tuagane ia matou e matou te iloa ifo ua uma ona saini pepa ma le malo, ua alu a ia faasaini, ae mo le silafia e lē aiāina e le suafa Seumalu eleele ma fanua o le suafa Valai Tapuni o Tiavea.”
Na fesiligia e Vasati le tele o le fanua, ae na ia faapea mai “o le tele e 2 ma le afa eka.” Ae o lea ua faamanino mai e le Siosiomaga e 5 eka, o le faataatiaga.”
O le seleni e pei ona faaali i luma o le nuu e 500,000 tala”. “Ua matou lē fiafia ona ua amanaia le matou tuagane lea ae lē o se suafa matai tau Valai.”
Fai mai Vasati o loo nofo pogisa pea poo ai lea o le a ia sainia le tupe o le lisi auā o lona manatu e tatau ona saini e suli o lona auaiga.
