O le Aso Faraile ua mavae 31 Me 2019, sa potopoto faatasi ai aiga, uo ma le mamalu o sui a le Leipa i Magele auā le ‘Campaign Launch’ – le Tatalaina aloaia ma le faalauaiteleina o sui tauva o le vaega a le Labour i Magele ma Otahuhu 2019. O latou nei ua filifilia e le vaega a le Leipa e tauva i le faigapalota faaleitumalo o le Auckland Council ia Oketopa 2019.
O Lemauga Lydia Sosene o le Taitaifono lea o le Komiti Local Board a Magele ma Otahuhu. Na muamua manumalo ma avea ma sui o le Local Board i le tausaga 2010. Ina ua ia toe manumalo i le faigapalota 2013, na filifilia ai loa e avea o ia ma Taitaifono o le Local Board, ma tumau lava i le tofi Taitaifono ina ua toe manumalo foi i le faigapalota o le tausaga 2016 seia oo mai lava i le tausaga 2019.
Fai mai Lemauga e toalua sui tuai a le komiti o le Local Board a Magele ma Otahuhu ua litaea maloloina ma ua faamavae e le toe tauva i le faiga palota o le 2019.
Ua faafetaia ai e le vaega a le Labour le afioga Tafafunai Tasi Lauese ma le tamaitai o Carrol Elliott mo le tele o tausaga o galulue malosi mo le manuia o tagata lautele ao avea laua ma sui o le Labour i le Local Board a Magele ma Otahuhu.
Ua mae’a foi ona faia le filifiliga a le vaega a le Labour mo le sailiga o ni sui fou e toalua e sui tulaga mo laua ua ritaea maloloina. Ua filifilia ai nei le afioga Anae Dr Neru Leavasa ma Harry Toaleafoa e avea ma sui fou e faaatoa ai loa le vaega a le Labour e tauva i le faigapalota mo tofi e pulea komiti faaleitumalo i Magele ma Otahuhu.
O sui uma o le vaega a le Labour o le a tauva mo tofi o le Local Board a Magele-Otahuhu, ua iai nei: Tauanuu Nick Bakulich, Makalita Kolo, Anae Dr Neru Leavasa, Christine O’Brien, Lemauga Lydia Sosene, Walter Togiamua ma Harry Toaleafoa.
Ua saunoa le Taitaifono ia Lemauga, “Ua matou fiafia ua mafai ona auai nisi sui fou o Anae Dr Neru Leavasa ma Harry Toleafoa i le vaega o le Leipa o le a fai ma sui tauva fou i lenei tausaga, ma e tele le aoga o tamafanau o le atunuu matou te galulue faatasi mo lenei taamilosaga o le faigapalota a le Auckland Council itumalo Oketopa 2019.
O le afioga i le Minisita o Tagata Pasefika, le afioga Aupito Su’a William Sio, na saunoa faapitoa i lea po e lagolagoina sui tauva uma a le Labour. “O sui uma nei a le Labour ua avatu i ai la’u faatuatuaga e galulue ma le faamaoni mo le manuia lautele a le tatou atunuu.”
Na faafetaia foi e Aupito le atunuu lautele ma le mamalu o tagata atumotu o le Pasefika sa auai uma i lea po mo le tapuaiga a’o faagasolo galuega a le Malo i le tapenaga mo le Tala o le Tupe a le Malo ua ta’ua o le Wellbeing Budget.
O lea Tala o le Tupe ua faavasega ai le $113 Miliona e faatupe ai galuega fesoasoani faapitoa mo Tagata Pasefika i Aotearoa.
O se taimi muamua lea i talafaasolopito a Niu Sila ua maua ai lea vaega tupe tele mo tagata Pasefika. Saunoa Aupito, e manaomia pea le tatou galulue faatasi ina ia maua pea le malosiaga i Pulega i Aukilani e galulue faatasi ai ma le Malo e faamautinoa le agavaa o tatou tagata i fesoasoani e faapei o auaunaga faalesoifua maloloina lelei, o avanoa aoaoga lelei, o avanoa e faatau ai ni fale ise tau taugofie, o avanoa mo galuega totogi lelei, atoa ai ma se penisione talafeagai pe a litaea mai galuega.
E amata le faigapalota lenei i le masina o Setema ma e lafo atu pepa palota i tuatusi o latou ua maea ona resitara.
