Malo faaaloalogia sa auai i le tatalaina o le asosi Samoa i totonu o le MIT

A’o alo atu Samoa i totonu o Niu Sila i le faamanatuina ma le faatāuaina o le vaiaso o le gagana Samoa, ae ua tatala faatasi ai ma le asosi a alo ma fanau Samoa o loo aotauina i totonu o le MIT i Otara. O le Aso Gafua 27 Me, na amata ai polokalame i totonu o aoga ma vaega taitasi o loo faamanatuina ai le gagana Samoa, e faapena foi i totonu o le MIT sa latou faamanatuina ma faatāuaina ai le vaiaso o le gagana Samoa e ala lea ia latou faafiafiaga faa-Samoa sa faia ai. Peitai o le tausaga ese lenei i totonu o le MIT ua faatele ai le polokalame i le faatāuaina o le gagana Samoa ona o lea ua tatala faatasi ai ma le asosi a fanau Samoa i totonu lava o le aoga.

O le susuga ia Musuiaiga Neil Tapu Sitagata ma le susuga ia Melvin Apulu ua laua taumafai e tuufaatasi lenei asosi. O le faamoemoe maualuga o lenei faalapotopotoga i totonu o le MIT, ina ia faatāuaina ai pea le gagana, o le aganuu aemaise o le itu i suesuega i mataupu mo i latou o loo sueuseina i totonu o le aoga. E tele polokalame Samoa o loo faatinoina i totonu o le MIT, ma iai la le lagona atonu e tele se fesoasoani a lenei sosaiete i alo ma fanau Samoa i le MIT i le tatou lava gagana.

O le toatele o alo ma fanau o loo aotauina i totonu o le MIT o fanau faatoa malaga mai i Samoa, e lē o atoatoa lelei le tautala i le gagana peretania, atonu o le tasi lea veaga e fesoasoani i ai le asosi a Samoa. O le auga lava o le asosi mo alo ma fanau o Samoa, ae lē o taofia ai nisi o alo ma fanau mai isi atunuu, auā e toalua tamaiti mai Tonga o loo auai mai ai ae faapea foi i fanau mai Rarotonga ma Niue o loo fesoasoani mai i le galuega. E toasefululima fanau o lea ua auai i totonu o le sosaiete e toatasi le tama ma teine e sefulufa ma faiaoga e toalua le susuga ia Musuiaiga Neil Tapu Sitagata ma Melvin Apulu o loo faamaopoopoina tamaiti. 

I le taimi nei o loo mautu ma maopoopo le asosi a Tonga mai le tele o tausaga, o loo iai foi le asosi a Niue, Cook Island ma Rarotonga, ae toe lava o Samoa e lei iai se asosi ma o lea ua taumafai ai e faavae se asosi Samoa i totonu o le MIT. O le MIT o loo tu tonu lava i le ogatotonu i Otara, o Otara foi o loo toatele ai tagata Samoa o loo nonofo ai, ae o loo toatele foi fanau o loo aotauina ai, o le a’e ai o se lagona i nei tamalii o le atunuu i se asosi Samoa i le MIT ina ia faamaopoopo ai alo ma fanau o le atunuu, ia fai se sao, e lē gata i totonu o le laumua ae faapea foi ia Niu Sila atoa o loo iai le komuniti Samoa. 

O le afioga ia Peseta Lotu Iiga o le Deputy Chief Executive, Pasifika & Student Journey i totonu o le MIT o ia lea o loo iai i lalo le faamalumaluga o lenei sosaiete ma o loo iai foi lona loto atoa ma lona naunautaiga ia faavaeina se sosaiete faapea i totonu o le aoga.

O le tatalaina o le vaiaso o le gagana Samoa na ootiina faatasi ai ma le lipine e aloaia ai le faavaeina ma le faatuina o le Asosi Samoa i totonu o le MIT. O le afioga i le Minisita o tagata atumotu o le Pasefika ia Hon Aupito Su’a William Sio sa ia ootiina le lipine ma o le lauga aami foi lea o le aso, faatasi ai ma le afioga ia Peseta Lotu Iiga.

O le matagofie ma le maualuga o le faamoemoe i totonu o le MIT ona sa auai atu i ai le afioga i le Konesula o le malo o Samoa ia Faolotoi Reupega Pogi, o nisi o sui o le malo, o mātua faapea ma nisi o aoga tulagalua faapea ma le ausiva a le Malu measina e faafiafia ai. O le susuga i le faafeagaiga ia Rev Seuao Penisula Tuaniu sa ia ta’ita’iina le polokalame i le sauniga lotu a’o alo ma fanau o loo auai i totonu o le asosi Samoa ua faavaeina sa fofogaina polokalame o le aso.