O le osofaia ai e ni taulelea se toafā o le lālā o le faletupe o le Westpac i Vaitele-tai i le taeao o le Aso Tofi, 8 o Aperila 2010 ae faatoa tatala lava le faletupe mo ana galuega masani, ua fautuaina ai nei e le Matagaluega o Leoleo ma Falepuipui, faletupe uma i le atunuu faapea ma pisinisi, ina ia silasila loa e faapipii ni mea pueata poo surveillance camera e mafai ona pue ai ni gaioiga a ni tagata gaoi, poo nisi gaioiga faasolitulafono. “O le tulaga tonu lena ua tatau ona silasila i ai faletupe ma pisinisi auā o lea ua oo mai lava i Samoa gaioiga o loo faia i fafo e pei ona osofaia ai le Westpac”. O le finagalo lea o le komesina lagolago, le afioga Leaupepe Lealaitagomoa Fatu Pula, ina ua fesiligia e tusitala.
“Ana iai ni mea pueata e mafai lava ona maua vave i latou na faia”, na saunoa ai le komesina lagolago o le Matagaluega o Leoleo ma Falepuipui. E lei mafai ona faamaonia e leoleo molimau e faapea ua iai se talosaga a se tasi o faletupe o le Samoa Commercial Bank mo se faatagaga e umia ai e a latou tagata faigaluega sinia e vaaia lālā o a latou faletupe, ma leoleo o le puipuiga poo sikulati, ni auupega (laau malosi) e fuafua la mo ni osofaiga faapea e ono aafia ai i se taimi.
Pau le itu ua manino mai, ua nofo sauni lea faletupe e tapena vaega uma mo le malupuipuia o ana meatotino i tupe ma tagata faigaluega ona o le tulai mai o le gaoiga o le lālā o le Westpac Bank i Vaitele-tai. Faaalia e le alii pule o Lemalu Ray Ah Liki, ua tāua tele le faalavelave na tupu ua mataala ai foi le Samoa Commercial Bank mo ni tulaga faapea e ono aafia ai lana auaunaga ma le tautua.
O le faagasologa o suesuega a leoleo ua molia ai se tamā ua 47 tausaga mai Tapatapao i lona taliaina o ni tupe gaoi. Faaalia e le afioga Leaupepe Fatu Pula, le sui sooupu o le matagaluega o leoleo, o lea tagata na ia talia le tasi le afe tala mai se tasi o taulealea o le toafā na faia le osofaiga.
O se tupe lea mai le aofaiga e $243,750 tala na gaoia mai le gaioiga a ia taulelea. O le a valaau eseese moliaga o alii e toafā ma le moliaga o le alii 47 tausaga o Tapatapao. Ua faailoa mai foi e leoleo o le aso 20 o Aperila 2010 (Aso Lua o le vaiaso nei taimi Samoa) o le a valaauina ai moliaga o le faomea faasaga i alii e toafā na faia le osofaiga.
O loo aofia i le toafā lea ma se auso tama mai Aleisa e faapea sa soifua a‘e i Niu Sila i le tele o tausaga a o laiti seia oo i le talavou, ae na toe tipoti mai i Samoa i le tausaga e 2004 ona o ni solitulafono na aafia ai i Niu Sila. O loo fesootai leoleo i Samoa ma leoleo i Niu Sila mo le fia saga faamaonia o lea tulaga.
O suafa o lea auso tama o Nasario ma Robert Chong Nee. Ua maua e leoleo le fana na faaaogā i le osofaiga o le faletupe ma o loo faia suesuega poo le ā tonu le ituaiga o laau malosi. Pau le faamatalaga a leoleo o se fana e foliga na tipi faapuupuu.
