E le fua tasi faafitauli eseese e mafua ai ona tulai mai ni vevesi ma ni feteenaiga i sui o se faalapotopotoga tumaoti ma faapogai ona fefulituaai ma masofa ai le faatuatuaina o se laulau o vaaia lea faalapotopotoga, aemaise lava pe a iai ni faaletonu tau tupe, po ua tuai foi ona maua ni lipoti o faamatalaga o le faaaogāina o meatotino e pei o seleni. O le fonotaga faalauaitele na tapenaina e le SUNGO le faamalu o faalapotopotoga tumaoti i Samoa, sa soalaupule ai nisi o mataupu tāua e pei o Komisi suesue i le faamatai, ma le saolotoga o lotu ma tapuaiga i Samoa, aemaise le tulafono taufaaofi mo le faatuina o fale kasino, na saunoa ai le alii Palemia ma ia folasia ia vaega e avea ma luitau mo sui auai o le SUNGO.
Na saunoa Tuilaepa ma ia toe tolaulau le vao filifili o faafitauli o loo mafua ai ona malepe ma salalautasi ni faalapotopotoga tumaoti. O le mafuaaga lea ua silasila ai le Malo e teuteu le tulafono na faatuina ai se faamasinoga faapitoa poo se Tribunal e suesue ai ni vevesi ma ni feteenaiga i totonu o faalapotopotoga tau taaloga, ina ia tuu i ai ma faalapotopotoga tumaoti. O vevesi na aliali mai i le pulega o le faalapotopotoga o le taaloga soka na mafua ai ona fausia lea tulafono, lea na muamua lava suesue ai faaletonu sa aafia ai le soka a Samoa. O le faaiuga na taunuu i ai lea mataupu o le faamalolo uma o sui o le laulau poo le komiti faafoe, ae toe sailia nisi sui o se laulau fou e pei ona iai nei.
Pau lea o le fofo ua silasila le Malo e mafai ona soalaupule ai ni feteenaiga e aafia ai faalapotopotoga tumaoti ma maua ai se tali o ni faafitauli, ma ua faailoa ai e le taitai o le Malo o le a teuteu le tulafono ina ia tuu i ai faafitauli o tino tau taaloga ma faalapotopotoga tumaoti i le atunuu. O se faiga na faaalia e Tuilaepa e ausia ai pulega lelei ma maua ai le toafilemu. E tele faalapotopotoga tumaoti ua salalautasi i ni faafitauli na aafia ai, ma e oo mai i le taimi nei e lē o manino lava mafuaaga o feteenaiga ma ua malepe ai. Faaalia e le Peresitene o le SUNGO le tofa Vaasilifiti Moelagi Jackson, o se tulaga tāua ua faailoa e le taitai o le Malo, auā o le a tusisia ai e sui auai o le SUNGO taiala ma alafua e faafoe ai a latou faalapotopotoga.
E foliga mai i le finagalo o le Peresitene ma le Pule Sili, o faafitauli lava tau tupe e mafua ai ona fefulituaai se faalapotopotoga tumaoti i Samoa. O le isi itu o le faatino o ni auala faaalatua e saili ai le palota manumalo e toe tumau ai pea sui o se laulau o loo pulea, ma atili ai ona fausasaga faaletonu e aafia ai le lotoifale o se faalapotopotoga. Talosia e pei ona saunoa le susuga i le Fesoasoani Katoliko le susuga Ioane Iosefo, o le a teuteu ai faaletonu e aafia ai sui auai o le SUNGO i le faamasinoga faapitoa o le a vailiili ai ni faaletonu ma ni laufai ua masaesae ai le fealofaniga o sui o le faalapotopotoga tumaoti i le atunuu.
