Ua feagai Vini ma Tapaga, ua feagai foi Lolua ma Vana. Ua fetapa‘i i alo o le nuu ae lē o tua o le nuu. Ua tini le uto e pei o le faiva i vai ina ua ogatasi le futia ma le umele i le faamoemoe sa atofaina ma tuupoina, o le tatalaina lea o se tasi o Ekalesia fou e faaopoopo i Ekalesia e iva o loo iai nei a le EFKS o le Pulega a Saute i Brisbane Ausetalia, ma ua tupu ma ola le galuega.
O le itula e sefulu i le taeao o le Aso Toonai, aso 17 Aperila sa tatalaina ai le Ekalesia fou ua faaigoaina, o le Sulu o le Malamalama.
O le Taitai o le Sauniga o lea faamoemoe tāua o le Toeaina o le Pulega, le Susuga ia Rev Tauaana Mata‘afa. O le faitauina o le Afioga Paia a le Atua sa feagai ma le Susuga ia Rev Parataiso Afaaso. O talosaga molia sa feagai ma le Susuga i le Faafeagaiga ia Rev Ionatana Faaiuaso. O le fatu o le aso poo le upu faamalosi, sa saunoa i ai le susuga ia Rev Petaia Tu‘ifao, le Failautusi o le Pulega.
O nai fuaitau sa saunoa manino i ai lana auauna e faapea, O le autu o le feau “Tasi le loto”. O nuu ma ekalesia i Samoa e fausia e Alii ma Faipule e mamalu pulega a nuu ma alalafaga taitasi, peitai o atunuu i fafo, o Siāsau ma Siā‘opo, e sau lava le tagata ia ma lona tupu ma lona mamalu mai lea nuu ma lea alalafaga. O nei tupu ma tamalii, e gata lava lona mamalu i totonu o lona ia lava aiga ma lona nuu, ae a oo loa i totonu o tapuaiga ma ekalesia, e tatau lava ona faaseetuāgalu ia tupu ma ia mamalu ae tasi le loto o tagata uma ina ia manuia le galuega.
Sa apoapoai faamalosi pea lana auauna i le tasi felanulanuai, e tele ona lālā e pei o le onosai, lotomaulalo, faapalepale ma le alofa. Afai ae faamausaliina se ekalesia fou i nei lālā, e le taumate le tupu ma le ola lelei o le mafutaga mafana i lea foi ekalesia. O nisi ia o fuaitau sa siitia mai e lana auauna i le Tusi o 1 Korinito 1:10.
E lima matafale o le ekalesia fou ma e lata i le fitusefulu le aofai o tagata lotu. O lenei sauniga faapitoa sa taualuga i se taumafataga matagofie sa tapena lava e le Ekalesia fou. Sa faataunuuina foi faaaloaloga masani e ala i le ta‘iina o sua a le au faigaluega Faafeagaiga ma Toeaiina aemaise le pa‘ia ma le mamalu o le auvalaaulia. E moni ai le upu masani “e laitiiti ae ma‘ini” auā na maofa tagata uma i le matautia o tapenaga a le Sulu o le Malamalama i soo se vaega. Sa lei alo tamala pe faatafa le ekalesia fou i le mataina i lea aso, e le gata o le laufofoga fiafia o tagata uma, a o le faatinoina o o latou tiute, ma e matinoa lava le tasi o le fatu o le lotogatasi o le a totō i totonu o le Sulu o le Malamalama. O i latou uma e totoa loto ma malolosi i le itu i le tino ma le faaleagaga e pei foi o le tofa ia Fata Peteli ma le tausi ia Rosa Peteli o loo logologā lana tautua i le Matau‘ainas Takeaway.
O le tofa foi ia Fata Peter Peteli sa tulai e feagai ma faaaloaloga, ae o le failautusi, le Susuga ia Nanai Saoaumaga Nanai sa molimolia se faafetai i Ao o Faalupega ma faletua faapea le auvalaaulia sa auai ai. E toatasi le A‘oa‘o Fesoasoani o loo iai i le faavaeina o le lotu, o le Aoao lenei e suafa ia Mulipola Isaraelu ma lona faletua ia Fuamatala faatasi ai ma matafale e pei ona ta‘ua e toalima.
O le susuga i le A‘oa‘o ua i‘u mai Malua o loo vaaia nei le aulotu fou, le susuga ia Faasoi ma le faletua ia Taleta Maua. E iai le faamoemoe ma le faitalia i le ekalesia fou i se tasi ua latou filifilia e avea ma o latou faafeagaiga, ona faatoa osia lea o se feagaiga i le va o le ekalesia ma se faafeagaiga o le a latou filifilia, ae o le taimi nei o loo tausia pea e le susuga i le A‘oa‘o ua iu mai Malua ma le faletua. E iva ekalesia o le Pulega lenei a Saute, ma o lea ua atoa nei le sefulu i le ekalesia fou ua faaopoopo mai, le Sulu o le Malamalama.
O le Susuga ile Toeaina ia Rev Elder Tauaana ma Senerita Mataafa o le faifeau Toeaina lea o le Pulega o loo la tausia le ekalesia a Southwest. O le ekalesia a Logan City o le Susuga i le Faafeagaiga ia Rev Ionatana & Alapeta Faaiuaso. Ekalesia a Southside o Rev Petaia & Sarai Tu‘ifao.
Ekalesia a Le Lamepa o Rev Perelini & Tiliilagi Tauilo. Ekalesia a Logan East o Rev Isamaeli & Kuinivia Liaina. Ekalesia a Acacia Ridge o Rev Pevise & Shirley Leo. Le Petesa Fou o Rev Peniamina & Lesa Tuifaasisina (teutupe o le Pulega). Ekalesia a le Papa o le Olataga o Rev Neti & Faauu Seluka.
Ekalesia a Loganholme o Rev Parataiso & Shalom Afaaso. Ekalesia Sulu o le Malamalama ua vaaia nei e le A‘oa‘o iu mai Malua, susuga ia Faasoi ma le faletua ia Taleta Maua, seia palota le ekalesia i se faafeagaiga e osia le latou feagaiga e avea ma o latou taitai tumau poo le toe palota foi ia Faasoi Maua pe filifili lava latou i se faafeagaiga latou te mananao ai.
Sa auai ma molimauina e le Susuga i le Toeaina Faatonu ia Rev Elder Terika Reupena o le Matagaluega EFKS a Kuiniselani lea faamoemoe, ua luasefulutasi ai nei ekalesia EFKS o le Matagaluega a Kuiniselani ae tolu Pulega.
