O fautuaga a tina o loo nafa ma le galuega alofilima o le toe lalagaina o le Ie Samoa poo le ietoga mao‘i i lona ninii, le umi ma le lautele o le mafuaaga lea o le liliu o le malo e faatulafono e ala i se fautuaga mai le taitaifono ma le komiti o le Ie Samoa.
Ua faaalia e le sui taitaifono o lea komiti, le afioga i le Minisita o Mataupu tau Tina ma Tamaitai Atina‘e o Nuu ma aga Fesootai, le tofa Tolofuaivalelei Falemoe Lei‘ataua, ua faitioina tele e tina o fale lalaga o le Ie Samoa, le taumafai mai e toe faatumau le measina a le atunuu, ae o loo saoasaoa pea le lalagaina e nisi o tina o ie tetele ua matuā leiloa lea uumi ma le lautetele ua iai, aemaise lava o le patua valu o nisi o ie ma ua pei foi o se tosi o se fala ninii.
“O tina o fale lalaga e ana le fautuaga i le komiti o le Ie Samoa e tatau ona faia se faiga e taofia ai ie ua soona lapopoa tele, auā e leai lava se uiga e fai ai le polokalame mo le toe lalagaina o le Ie Samoa mao‘i ae a isi lava e lē savavali ai”.
Na saunoa le Minisita o le Matagaluega o Mataupu tau Tina ma Tamaitai, Atina‘e o Nuu ma Aga Fesootai, e lē o faavaivai le Malo e unaia pea lenei vaega tāua o tu ma aganuu a Samoa, o le toe foi i le lapoa ma le umi o le ie sa iai.
O le fua a le Malo o loo iai nei i le Ie Samoa o le 12 aga le umi, ae iva aga le lautele. Talu ai foi la o lea ua foliga ua uu tupe ai tina i le lalagaina o le ie Samoa mao‘i na faaalia e le Minisita ua silasila le Malo e fai se isi fua tau lapoa atu i le 15 aga le umi ae 8 aga le lautele.
O nisi ia o ie o loo manaomia tele e tagata i faalavelave ma o loo faaalu ai seleni e faatau mai ai i tina o fale lalaga.
O le isi lea itu tāua o le polokalame ona e lē gata ina faatumau ai pea le mamalu o le Ie Samoa ae mo i latou e lē agavaa i le lalagaina ae lava le seleni e mafai ona latou faatau mai i fale lalaga, ma o se avanoa foi e uu tupe ai tina i lo latou tigaina ma maua ai le fesoasoani mo le atina‘e ma meafai a aiga ma nuu.
O le tulafono o loo tapenaina nei e le ofisa o le Loia Sili o loo fuafua e faamalosia ai lea fua ina ia tausisia e tina uma o le atunuu o loo lalagaina le measina lenei a le atunuu.
Talu ona liliu le Malo e toe fafagu mai le Ie Samoa mao‘i, ua faaalia e le minisita ua tusa nei ma le 3000 ie ua mae‘a ona lalaga ma ua taamilo nei i faalavelave fai o le atunuu.
O le ie foi lea o loo pito sili ona taugata pe a faatau atu ona e oo lava i le tau e lima afe tala.
O ie tetele taatele e pei o le 25 i le 30 aga le uumi e na o le tasi le afe tala. O loo alumia tele le Ie Samoa i faatauga a nisi mai le atunuu o Tonga, ona o le ie tonu lea o loo tāua i tu ma aganuu a lea foi motu tuaoi.
