O le isi leoleo sinia sa aafia i le suesuega o le faaaogā o laau faasāina ua litaea”..Leaupepe Fatu Pula
Ua fai si umi o faagasolo suesuega a le vaega o amioga taualoa a le matagaluega o leoleo ma falepuipui i se tuuaiga faasaga i ni leoleo se toalua e i totonu o le tiute o leoleo o le faafeaoina o tofiga maualuluga o le Malo e pei o le Ao o le Malo ma le sui o le Fono a Sui Tofia poo le Sui Ao.
O se vaitaimi o le tausaga na tea nei na faia ai ia suesuega e pei ona faailoa mai e le sooupu o le Matagaluega o Leoleo ma Falepuipui afioga Leaupepe Lealaitagomoa Fatu Pula, o se tasi foi o Komesina lagolago.
“O se taimi o le tausaga na tea nei ma ua fai si umi talu ona faia suesuega”, na saunoa mai ai Leaupepe.
Na ia faaalia foi o le tasi o leoleo, o se faafeao mo le Ao o le Malo, ma o le tausaga na tea nei na malolo litaea ai.
O le isi o leoleo faafeao o loo galue pea i le taimi nei.
Faaalia e le sooupu o le suesuega a le vaega o amioga taualoa, le Police Professional Standards Unit, i le mataupu e oo mai i le tausaga nei e lei maua se faaiuga.
Na iloa e leoleo le mataupu e faatatau i ia leoleo e toalua ona o se faamasinoga o moliaga o laau faasāina, sa faaalia ai e lē sa molia o ni leoleo o loo faafeaoina le Ao o le Malo o nisi ia o ana paaga e masani ona ia faatau i ai maruana.
O le feagaiga ua mae‘a sainia e le Matagaluega o Leoleo ma le ofisa o le Komesina o Sulufaiga na faaalia e Leaupepe Fatu Pula, e avanoa ai ona toe iloilo e le Komesina o Sulufaiga ma lona ofisa ni suesuega e faia e leoleo faasaga i isi leoleo pe afai e fesiligia e le atunuu le amiotonu o le taunuuga o se suesuega, pe fesiligia foi se faaiuga e faia e le Komesina.
O le suesueina o ia leoleo e toalua na faia a o lei sainia le maliega, le memorandum of understanding ma le Komesina o Sulufaiga.
Faaalia e le sooupu e fai lava e leoleo le suesuega ona ave lea i le Komesina o le taunuuga ma faia ai se faaiuga.
O le malolo litaea o le tasi o leoleo sa umia le tulaga superenitene, e lē o manino ai le sooupu pe faapefea se faaiuga e faia i ai, ae o le leoleo o loo galuea pea e lē o iloa pe o faamalolo lē tumau a o tālia se taunuuga o suesuega.
E lē o mafai ona silafia e le sooupu poo le ā le umi e faagasolo ai suesuega i le mataupu ae poo afea foi e maua ai se faaiuga.
