O maota tumau o le Konesula ma le Komesina, le nofoaga autu poo le Ofisa o le malo
O maota e lua e pei ona taua, o loo fausia uma i luga o le fanua o le Malo o Samoa, e pei ona faatauina i le tolotolo i se vaega o Magele, e faasaga agai i Onehunga.
O le vaiaso na tea nei, na asia ai e le Samoa Times le nofoaga ma le fanua lea o le Malo i Magele, ma molimauina ai le tulaga ua iai le galuega o loo faagasolo. O ni fale matagofie tele, e pei ona ua mae‘a fausia le maota mo le Komesina o Fefaatauaiga, a o foufou faaiu le galuega mo le maota o le Konesula o Samoa.
O le isi itu atoa o le fanua, o loo faataalaelae pea, ona o le fuafuaga a le malo.
O le a fausia ma tapenaina ai foi se malae e faatatau i fuafuaga faalemalo, atoa ma sauniga faapitoa e le gata i le malo, a o tagata lautele.
Ae le gata i lea o le a maua ai ma se avanoa mo tapenaga a lana aulakapi, le Manu Samoa, pe a afea Niu Sila i ana malaga taamilo, ma taaloga.
O nisi ia o fuafuaga mamao a le malo o Samoa, ina ia saga faaleleia atili ana amepasa ma avefua o loo autovaa mai e tauave tiute ma galuega a le malo i Niu Sila.
Aemaise ai o Niu Sila lava ia, o loo matua numera tasi le toatele o le mamalu o le atunuu, ua faaaiga lua i ai, e faamautu, alala ma nopiai ai.
E le puupuu se taimi na fuafua ma finauina ai e le alii Palemia ma le malo o Samoa le umia saoloto o ia fanua, mo le faataunuuina ai o ana polokalame faagasolo mo nei ma ielua.
O le mautu o ia meatotino a le malo, o le a avea pea ma fafagu, ae o ni pine faamau mo tupulaga faia‘e a Samoa o loo ola ma soifua i Niu Sila.
O se isi ata e toe faamanatu mai pea i le umia ai e le malo o Samoa o ia aseta i Aukilani ma Niu Sila, o se isi foi faamaufaailoga taua o faigauo a malo, ma atunuu e lua talu mai le tele o tausaga ua mavae.
O le lotoā a le malo i Magele, ua mae‘a foi ona siomia i se pa mautu, mo ona puipuiga, aemaise o le saga faamatagofieina atili.
O le isi fanua i Magele i tafatafa ane o le KFC, e faafesagai ma le taulaga faatau a Magele, o loo tau faamae‘a nisi feutagaiga ma le Pulega o le Aai i Aukilani.
E iai ona lavelave ma ona faigata, peitai e iai le talitonuga o le a manuia sona taunuuga, ma mafai ai ona faaauau le galuega a le malo e pei ona fuafuaina.
O le fanua tonu lea, o loo faamoemoe e fausia ai le fale o le a ogatotonu i ai ofisa ma galuega a le Malo o Samoa i Niu Sila.
O lona ofisa autu o loo i le maota Samoa i K-Road, o le a suia i Magele pe a manuia ma taulau fuafuaga i le fanua i Magele, e pei ona faia pea i ai talanoaga ma faamautu.
O le fanua foi lea ua mae‘a ona totogi le tiposi e le Malo o Samoa, e pei ona faamaonia mai e le Konesula le afioga ia Faolotoi Reupena Pogi.
